09/10/2024
حددنا الشرب ... تمام ؟؟ يالا بقي نبدأ
هتبدأ بند السباكه في شقتك وعايز تعرف تفاصيل أكتر عنه ؟
احنا في ARKAN # بنقولك إن بند السباكه من أهم البنود اللي لازم تهتم بيها ف التأسيس ..
لأن الغلط في البند دة هيعملك مشاكل طول عمرك ومتستهونش بيها ..
السباك بيدخل الشقه ومعاه الرسومات اللي بتحدد هتحط القاعده فين ؟ والحوض فين ؟ وهل هتعمل شاور ولا بانيو ؟ والخ …..
واماكن التكييفات عشان بيكون ليه صرف داخلي ف الشقه عشان مترميش المياه عالجيران ..🤷♂️
وهيطلب منك طلبات التأسيس .. هتنزل تجيبهم ..
الخامات دي فيه منها الغالي والرخيص بص نصيحة من اخوك بلاش تسترخص في خامات تأسيس السباكة عشان هتزعل بعد كده 😎
تعالي اقولك إن عندنا في تأسيس السباكة حاجه اسمها تغذية وحاجه اسمها صرف
خامات التغذية :
أكواثيرم ودي ألماني وسعرها عالي شوية
بولو بلاست ودي ألماني بس سعرها متوسط
و بي أر ودي بقي صناعة مصريه بتكنولوجيا ألمانيه .. وسعرها تقريبا زي البولو بلاست
وفيه خامات انواع تانيه زي البحر الاحمر بس اللي فوق دول أشهر 3 شركات ف السوق ..
خامات الصرف وليها اكتر من نوع :
حمزة , بروج , الشريف , سمارت هوم ….الخ
هنجيب الخامات وهيبدأ في تأسيس شبكتين ( تغذية وصرف )
لازم نحدد من الاول اذا كنا هنركب حوض بركبة او حوض بعامود او حوض ساقط رخامه ,, هل هتركب سيفون دفن جوة الحائط ولا سيفون عادي ؟
هيبدأ السباك يكسر ويعمل مسار لمواسير التغذية ويركب المواسير ويخلص الشبكة كاملة بتاعت التغذية وبعد كدة ينضف الارضية كويس جدا من بواقي التكسير ، ويعمل طبقة لياسة من المونه لنظافة السقف
وقبل ما نعمل شبكة الصرف بتاعتنا : ندخل ف موضوع #العزل لان العزل بيتعمل قبل الصرف واوعي تصدق السباك اللى هيقولك العزل بيتعمل فوق بعد مواسير الصرف او انه مالوش فايده ..
فايدة العزل انه بيحمي جارك اللي تحت منك والحوائط بتاعتك من المياه البسيطة اللى بتتسرب من ارضية الحمام ولكن لو فيه مشكلة سباكه ...مفيش اي عزل هيوقفها ..
العزل : 🤌
فيه أنواع كتير من العزل ... بس أشهرهم عزل الميمبرين و العزل الاسمنتي " الكيماوي "
السباك ممكن يكون معاه حد للعزل وممكن لأ ..
فهتضطر تجيب حد يعزل بعد مالسباك يخلص تغذية..
العزل الاسمنتي أفضل ( زي شركة سيكا وكيماويات البناء الحديث او باسيف الالمانيه )
👈 هنتكلم بعد كده في بوست ونشرح طريقة العزل بيتم ازاي 🤌
استلام العزل : هيملا الارضية كلها بالمياه وبعد ٤٨ ساعه تبص على حوائط الشقه وسقف الشقه اللي تحتك في حالة انها مش متشطبة ... لو لاحظت نشع يبقي العزل اختباره سقط ولازم تعيد العزل من تاني ... 🤷♂️
وبعد كدة هيبدأ السباك يركب شبكة الصرف واللي بتشمل مواسير صرف التكييفات ..
وبعد لما يخلص
هتتصل بالشركة المصنعه لمواسير التغذيه عندك وهتيجي تعملك اختبار على مواسير التغذية وتبصلك على لحامات مواسير الصرف وتديك شهادة ضمان..
👈 بعد كده السباك يبدء يحبش على مواسير الصرف بمونه عشان يحميها ان حد يدوس عليها او تتكسر لانها بتكون مظبوطة بميل معين
وبعد كدة بنعمل حاجه اسمها لياسة " وديه مونه بنفردها عالارض عشان تحمي العزل بتاعنا ..
👈 مستني ارائكم واستفساراتكم في التعليقات 🍂🤎
furnituredesign #
