16/12/2017
ලංකාවෙ නිෂ්පාදනවලට රුසියාවෙන් තාවකාලික තහනමක්
හර්ෂණ තුෂාර සිල්වා
ශ්රී ලංකාවේ තේ ඇතුළු වැවිලි නිෂ්පාදන ආනයන මත රුසියානු සමූහාණ්ඩුව තාවකාලික තහනමක් පනවනු ලැබ තිබේ.
ශ්රී ලංකාවෙන් රුසියාවට යවන ලද තේ තොගයක තිබී කුරුමිණියකු හමු වීමත් සමඟ රුසියානු සමූහාණ්ඩුව එම පියවර ගෙන තිබේ. මේ අනුව ලබන සඳුඳා සිට ශ්රී ලංකාවෙන් තේ සහ අනෙකුත් වැවිලි නිෂ්පාදන ආනයනය කිරීම තාවකාලිකව නවතා දැමීමට රුසියානු සමූහාණ්ඩුව තීරණය කර ඇත.
මෙරටින් යවන ලද තේ තොගයක තිබී ‘ට්රෝගෝඩර්මා ග්රානේරියම්’ යන විද්යාත්මක නාමයෙන් හඳුන්වන කුරුමිණි විශේෂය හමුවීමත් සමඟ රුසියානු සමූහාණ්ඩුව අදාළ පියවර ගෙන තිබේ. මෙම කුරුමිණි විශේෂය ගබඩා කරන ලද ධාන්ය වර්ගවල බහුලව සිටින අතර ලොව සිටින වඩාත් හානිකර කෘමි විශේෂයක් ලෙස ද හැඳින්වේ.
මෙම කුරුමිණි විශේෂය සහල් ඇතුළු ධාන්ය වර්ග ගබඩා කරන ස්ථානවල සාමාන්යයෙන් සිටින බව පවසන ශ්රී ලංකා තේ මණ්ඩලය සඳහන් කරයි. කිසිදු අවස්ථාවකදී මෙරටින් යවන ලද තේ තොගවල එම කුරුමිණි විශේෂය සිටි බවට තොරතුරු වාර්තා නොවන බව ද එම මණ්ඩලය සඳහන් කරයි.
කෘමීන් හමු වූ තේ තොගය සහිත බහාලුම මීට පෙර ධාන්ය ප්රවාහනය කිරීමට යොදාගත්තක් බවත් එය ශ්රී ලංකාවට අයත් බහාලුමක් නොවන බවත් මේ සම්බන්ධයෙන් නිවේදනයක් නිකුත් කරමින් වැවිලි කර්මාන්ත අමාත්යාංශය සඳහන් කරයි.
රුසියාව මෙරටින් ආනයනය කරන වැවිලි නිෂ්පාදන මත මෙම තහනම පනවා ඇත්තේ තාවකාලික පදනම මත බවත් ශ්රී ලංකා රජය සමඟ මේ සම්බන්ධයෙන් අදාළ කරුණු පැහැදිලි කරගත් පසු එම තහනම ඉවත් කරන බවත් වැවිලි කර්මාන්ත අමාත්යාංශය නිකුත් කළ නිවේදනයේ දැක්වේ. මෙම අර්බුදය විසඳීම සඳහා වැවිලි කර්මාන්ත අමාත්යවරයා අවශ්ය පහසුකම් සැලසුණු විගස රුසියාවේ සංචාරය කරන බව ද එම නිවේදනයේ දැක්වේ.
මෙම අර්බුදකාරී තත්ත්වය නිරාකරණය කර ගැනීම සඳහා වැවිලි කර්මාන්ත අමාත්යාංශය, ශ්රී ලංකා තේ මණ්ඩලය, විදේශ කටයුතු අමාත්යාංශය, වෙළෙඳ දෙපාර්තමේන්තුව ආදී ඊට සම්බන්ධිත සියලු අංශ යුහුසුළුව කටයුතු කරන බව ද වැවිලි කර්මාන්ත අමාත්යාංශය නිකුත් කළ නිවේදනයේ වැඩිදුරටත් දැක්වේ.
රුසියාව යනු ශ්රී ලංකාවේ තේ අපනයන වෙළෙඳපොළක් වන අතර වාර්ෂිකව රුසියාවට අපනයන තේ තොග ප්රමාණය කිලෝග්රෑම් මිලියන 50කට ආසන්න වේ. එය සමස්ත තේ අපනයනවලින් සියයට 17කට ආසන්න ප්රමාණයකි. රුසියානු තේ වෙළෙඳපොළේ ශ්රී ලංකාවේ තේවලට හිමි ප්රතිශතය සියයට 23කි.
මේ වසරේ මුල් මාස දහයක කාලයේදී රුසියාව ශ්රී ලංකාවෙන් එක්සත් ජනපද ඩොලර් මිලියන 436ක වටිනාකමින් යුත් තේ ටොන් 141,300ක් ආනයනය කරන ලද බව ද දත්ත වාර්තා සඳහන් කරයි.
