01/11/2019
கைதி!
லாஜிக் பற்றி எந்த குறுக்கு விசாரணையும் செய்யாமல் ஒரு திரைப்படத்தை அப்படியே ஏற்றுக்கொள்ள வைப்பது அவ்வளவு சாதாரணமில்லை. அதெப்படிங்க ஒரு கமிஷனர் ஆபிஸ் ஒட்டுமொத்தத்தகவல் தொடர்பில் இருந்து துண்டிக்கப்படுவது சாத்தியமாகும்? பட்டாசு வெடித்தாலே பக்கத்து வீட்டுக்காரன் எட்டிப்பார்ப்பான் ஒருத்தன் மெஷின் கன் வைத்து படபடவென்று சுட்டுட்டு இருக்கான் ஒருத்தருமா அந்த பக்கம் எட்டிபார்க்கலை ?போன்ற விமர்சன புத்திகளை திரைக்கதையின் சுவாரஸ்யம் மறக்கச் செய்கிறது என்றால் 'கைதி'யை வெற்றிப்படம் என்பதைவிட, தரமான படம் என்று சொல்லலாம். கையை கொடுங்க சார்! என்று இயக்குனர் லோகேஷ் கனகராஜை பாராட்டலாம்.
ஒரு குற்றவாளி பிடிபட்டால் அவனின் பழைய ரெக்கார்டுகளை தூசு தட்டுவார்களே அதுபோல் கைதி படத்தை பார்த்துவிட்டு லோகேஷின் மாநகரத்தை ஓடிப்போய் பார்த்தேன். இப்படிதான் சில படங்கள், சில திறமைசாலிகள் சமகாலத்தில் ரசிகர்களின் பார்வைக்கு வராமாலே போய்விடுவார்கள். மாநகரம் அந்த பட்டியலில் போய்விட கூடாது லோகேஷ் அந்த துரதிருஷ்டத்தில் சேர்ந்துவிடக்கூடாது என்றே மாநகரத்தை பார்த்தேன்.
ஒரு ஸ்பெஷல் க்ரைம் ப்ராஞ்ச் ஆபிஸர் ,போதைபொருள் கடத்தும் கும்பல் இவர்களுக்கு மத்தியில் விபத்தாக மாட்டிக்கொள்ளும் லாரி டிரைவர் இந்த முக்கோணத்தனமான கதாபாத்திரங்கள்தான் படத்தின் அஸ்திவாரம் என்றாலும் படத்தைத் தூக்கி நிறுத்தும் இருதரப்பிலும் இருக்கும் உளவாளிகள், ஒரு கான்ஸ்டபிள், குடித்துவிட்டு போலீஸில் மாட்டிக்கொள்ளும் கல்லூரி மாணவர்கள் கும்பல், லாரி ஓனர் பையன், போன்ற கதாபாத்திரங்களால் கார்த்தியின் ஒன் மேன் ஷோ ஹீரோயிசத்தை அப்படியே ஏற்றுக்கொள்ள முடிகிறது. மற்ற கேரக்டர்களில் இருக்கும் ரியால்டி அதீதமாக புனையப்படும் கதாநாயகன் பாத்திரத்தை அக்சப்ட் செய்ய வைக்கிறது. ஒரு படம் முடியவே கூடாது இப்படியே இன்னும் கொஞ்சம் த்ரில்லாக போகட்டும் என்றெல்லாம் 'கைதி' விரும்ப வைக்கிறது.
ஆபாச காட்சிகள், டாஸ்மாக் பார்களில் மஞ்சள் புடவை கட்டவைத்து ,குத்துப்பாட்டு ஆடவைத்து என்றெல்லாம் வழக்கமான மசாலாகளை தடவக்கூடாது என்று யோசித்திருப்பது ஒரு புதுவகைத்தனம்தான். என்னை ஏன் சார் ஸ்டேசனுக்கு ஏத்துனீங்க ?தாடி வைச்சிருக்கறவன் எல்லாம் கிரிமினல் இல்ல சார்! என்னும் லாரி டிரைவரின் பின்னே ஒரு கவிதைத்தனமான அப்பன் மகள் காத்திருப்பு காட்சிகள் மனதை நெகிழ செய்கிறது. இதுபோன்ற கைதியெல்லாம் அடிக்கடி தமிழ்சினிமாவில் வெளி வரவேண்டும். ஒரு தமிழ்சினிமா ரசிகனின் அதிகபட்ச எளிய ஆசை இவ்வளவுதான்.
