03/09/2026
बाढी पछि वैकल्पिक सडक सञ्चालन सम्बन्धमा !
त्रिशूली नदीमा आएको बाढीका कारण गल्छी-त्रिशूली राजमार्ग तथा त्रिशूली नदीका विभिन्न पुलहरूमा क्षति पुगेर यातायात अवरुद्ध भएको थियो। यस अवस्थालाई मध्यनजर गर्दै रसुवा र धादिङ समेत हेर्ने सडक डिभिजन नुवाकोटले वैकल्पिक सडकहरू निर्माण, मर्मत तथा स्तरोन्नति गरी यातायात सञ्चालनमा ल्याउने काम गरेको छ ।
हाल सञ्चालनमा ल्याइएका वैकल्पिक सडकहरू:
१. पृथ्वी राजमार्ग-धादिङबेसी वैकल्पिक मार्ग (१५ किमि)
मास्टार (पृथ्वी राजमार्ग) देखि त्रिशूली पुल पार हुँदै केउरिनीटार, बेलिनटार, आदमटार, पिपलटार, गजुरीटार, नेपालटार, परेवाटार हुँदै धादिङबेसीसम्म सडक सञ्चालनमा ल्याइएको छ।
प्रभावित क्षेत्र: धादिङको गल्छी र सिद्धलेक
२. त्रिशूली पार क्षेत्र जोड्ने वैकल्पिक मार्ग (४० किमि)
त्रिशुली पारीको भूभागलाई यातायात सञ्जालले जोड्न गल्छी (गल्छी त्रिशुली राजमार्ग), त्रिशुली पुल पारीबाट त्रिशुली नदीको दाँया किनार तर्फबाट कल्लेरीटार, कोशीखोला, पिमलटार, दर्शनटार, छत्रेखोला, गौरीबेसी हुँदै त्रिशूली बजार र किस्पाङ गाउँपालिकाको सीमासम्म यातायात सञ्चालन गरिएको छ।
प्रभावित क्षेत्र: धादिङको गल्छी तथा नुवाकोटका तारकेश्वर, विदुर र मेघाङ
३. देवीघाट तादी खोला पुलको वैकल्पिक मार्ग (३५ किमि)
देवीघाट स्थित क्षतिग्रस्त तादी खोला पुलको विकल्पको रूपमा पिपलटार-धमले-निरञ्जना-बाघखोर-हर्रे-देउराली-कोल्पुटार सडकमार्फत चार पाङ्ग्रे सवारी सञ्चालनमा ल्याइएको छ।
प्रभावित क्षेत्र: नुवाकोटको विदुर र बेलकोटगढी
४. रसुवा आवतजावतका लागि वैकल्पिक मार्ग (१२ किमि)
त्रिशुली देखि बेत्रावती सम्मको राजमार्ग क्षतिग्रस्त भएकाले सो रसुवा जिल्लामा यातायातको पहुँचको लागि ढिकुरे (मध्यपहाडी राजमार्ग) हुँदै फेदी बेसीचोक, हिरामुनिटार, चोगते, बोरेभञ्ज्याङ, सानो खोला, धनस्वारा, भोर्ले, जिबजिबे, बोगटीटारसम्मको नुवाकोट खण्डमा सडक सञ्चालन योग्य बनाइएको छ। रसुवा खण्डमा पनि मर्मत कार्य जारी रहेको छ।
प्रभावित क्षेत्र: नुवाकोटको विदुर र सूर्यगढी
सडक डिभिजन नुवाकोटले आपतकालीन अवस्थामा विभिन्न उपकरण प्रयोग गरी सडक खुलाउने, पहिरो हटाउने, कल्भर्ट निर्माण गर्ने, सडक सतह सुधार गर्ने तथा ग्राभेल राख्ने कार्य निरन्तर गरिरहेको छ।
-- पूर्वाधार विकास मन्त्रालय
