03/06/2026
രണ്ടുമൂന്നു കൊല്ലം മുൻപാണ് ഒരു ദിവസം രാവിലെ സമൂഹ മാധ്യമങ്ങളിൽ ഞാനാ ചിത്രം കാണുന്നത്.
നിർമ്മാണത്തിനിടെ തകർന്നുവീണ ഒരു വീട്.
സംഭവം നടന്നത് എന്റെ നാട്ടിൽ നിന്നും ഏറെ അകലെ അല്ലാത്തതുകൊണ്ടും, നാട്ടിൽ പോകാൻ ഇനി ഏതാനും ദിവസമേ ഉള്ളൂ എന്നതിനാലും, ഈ വിഷയത്തിൽ ഒരു അന്വേഷണം ആകാം എന്ന് കരുതി, നാട്ടിൽ എത്തി അധികം താമസിയാതെ അങ്ങോട്ട് പോവുകയും ചെയ്തു.
ഇന്നും സമാനമായ ഒരു ചിത്രം കണ്ടു, അതുകൊണ്ടാണ് ഇതേക്കുറിച്ചു എഴുതണം എന്ന് കരുതിയത്.
ഇതിൽ എഴുതുന്ന കാര്യങ്ങൾ പലർക്കും അപ്രിയമായി തോന്നാം, എന്നാൽ അവ തീർത്തും സാങ്കേതികമാണ്, വീട് പണിയുന്നവർക്കും, പണിയാൻ പോകുന്നവർക്കും ഉള്ള മാർഗരേഖകൾ മാത്രമാണ്.
അതിൽ ഒരാളുടെയും പ്രീതിയോ അപ്രീതിയോ വിഷയമല്ല, ഇല്ലാത്ത കാശ് കടം വാങ്ങി, തല ചായ്ക്കാൻ ഒരിടം നിർമ്മിക്കുന്നവന്റെ താല്പര്യം മാത്രമാണ് ഇതിൽ വിഷയം. തമാശയുടെ ഒരു കണി പോലും ഇവിടെ പ്രതീക്ഷിക്കുകയും അരുത്.
എങ്ങനെയാണ് ഒരു കെട്ടിടം തകർന്നു വീഴുന്നത് ..? വലിയ കെട്ടിടങ്ങൾ മാത്രമേ തകരുകയുള്ളോ അതോ ചെറിയവയും തകരുമോ ..?
ശ്രദ്ധിച്ചു കേൾക്കണം, താല്പര്യം ഇല്ലാത്തവർക്ക് വണ്ടി വിടാം.
ലോകത്തെ ഏതു കെട്ടിടവും, അത് കോൺക്രീറ്റ് കൊണ്ട് ഉണ്ടാക്കിയത് ആയാലും, സ്റ്റീൽ കൊണ്ട് ഉണ്ടാക്കിയത് ആയാലും, എന്തിന് മണ്ണും വൈക്കോലും മുളയും കൊണ്ടുണ്ടാക്കുന്ന കുടിൽ ആയാലും അത് തകർന്നു വീഴാം, അതിൽ വലുപ്പ ചെറുപ്പം ഇല്ല.
ഇനി, എന്തുകൊണ്ടാണ് ഒരു കെട്ടിടം തകർന്നു വീഴുന്നത് ..?
ഒരു കെട്ടിടത്തിന്റെ തകർച്ചക്ക് നൂറു കണക്കായ കാരണങ്ങൾ ഉണ്ട്. ഇതുതന്നെ ഒറ്റക്കുള്ള കാരണങ്ങളും, സംയുക്തമായി അനുഭവപ്പെടുന്ന കാരണങ്ങളും കാണും.
എന്നിരുന്നാലും ഒറ്റ വരിയിൽ ഇതിന് ഒരു ഉത്തരം പറയാം.
ഒരു കെട്ടിടത്തിന്റെ " ഈക്വലിബ്രിയം " അവസ്ഥ നഷ്ടപ്പെടുമ്പോഴാണ് അത് തകർന്നു വീഴുന്നത്.
എന്താണീ ഈക്വലിബ്രിയം ..?
എൻജിനീയറിങ് മെക്കാനിക്സ് ക്ലാസുകളിലെ അറുബോറൻ സിദ്ധാന്തങ്ങളിലേക്കോ, ഇക്വേഷനുകളിലേക്കോ ഒന്നും ഞാൻ നിങ്ങളെ കൊണ്ടുപോകുന്നില്ല, മനസ്സിലാകുന്ന വിധത്തിൽ പറയാം.
രണ്ടു മല്ലന്മാർ തമ്മിൽ ഗുസ്തി പിടിക്കുകയാണ് എന്നിരിക്കട്ടെ.
രണ്ടുപേരും പരസ്പരം അങ്ങോട്ടും ഇങ്ങോട്ടും തോറ്റുകൊടുക്കാൻ മനസ്സില്ലാത്ത അവസ്ഥയിൽ അങ്ങനെ നിൽക്കുകയാണ്, പരസ്പരം നല്ല ബലം പ്രയോഗിക്കുന്നുമുണ്ട്.
ഈ അവസ്ഥക്കാണ് ഈക്വലിബ്രിയം അവസ്ഥ എന്ന് സാമാന്യമായി പറയുന്നത്.
ഇനി, പെട്ടെന്ന് മുന്നറിയിപ്പില്ലാതെ ഇതിലെ ഒരു മല്ലൻ പെട്ടെന്ന് ബലം പ്രയോഗിക്കുന്നത് നിർത്തുകയോ അല്ലെങ്കിൽ പിന്നോട്ട് മാറുകയോ ചെയ്താൽ എന്ത് സംഭവിക്കും ..?
സംശയം വേണ്ട, മറ്റേ മല്ലൻ മൂക്കും കുത്തി താഴെ വീഴും.
അതായത് ഈക്വലിബ്രിയം നഷ്ടപ്പെടുന്നതോടെ അയാൾ വീഴുന്നു എന്നർത്ഥം.
ഇതുതന്നെയാണ് എല്ലാ കെട്ടിട തകർച്ചയിലും സംഭവിക്കുന്നത്. അത് ജപ്പാനിൽ ആയാലും, അമേരിക്കയിൽ ആയാലും, കഞ്ഞിക്കുഴിയിൽ ആയാലും ശരി.
ഇനി നമുക്ക് അടുത്ത ഘട്ടത്തിലേക്ക് കയറാം, ഒരു കെട്ടിടത്തിന്റെ ഏതെല്ലാം ഭാഗങ്ങളിലാണ് ഈ ഈക്വലിബ്രിയം പ്രശ്നം ഉണ്ടാകാൻ സാധ്യത ഉള്ളത് എന്ന് നമുക്ക് പരിശോധിക്കാം.
അതിനായി നമുക്ക് വീട് നിർമ്മാണത്തിലെ സുപ്രധാനമായ രണ്ടു ഘട്ടങ്ങളെക്കുറിച്ചു മനസ്സിലാക്കാം.
വീട് പണിയിൽ ഫൗണ്ടേഷന് കുഴി എടുക്കുന്നത് മുതൽ പെയിന്റിങ്ങും ലാൻഡ്സ്കേപ്പും, ഭിത്തി പുട്ടി ഇടലും വരെ അനേകം ഘട്ടങ്ങൾ ഉണ്ടെങ്കിലും ഒരു സാങ്കേതിക വിദഗ്ധന്റെ കണ്ണിൽ രണ്ടേ രണ്ടു ഘട്ടങ്ങളിൽ ഇവയെ എല്ലാം ഒതുക്കാം.
ഒന്ന് - സ്ട്രക്ച്ചറൽ ഘട്ടം.
ഈ ഘട്ടത്തിൽ ആകെ മൂന്നു കാര്യങ്ങൾ മാത്രമേ വരുന്നുള്ളൂ.
ആദ്യത്തേത് ഫൗണ്ടേഷൻ.
രണ്ടാമത്തേത് ഭിത്തി, തൂണുകൾ, ബീമുകൾ, ലിന്റലുകൾ, കോൺക്രീറ്റ് ഗോവണി, ഇടക്കുള്ള സ്ളാബുകൾ എന്നിവ ഉൾപ്പെടുന്ന സൂപ്പർ സ്ട്രക്ച്ചർ.
മൂന്നാമത്തേത് റൂഫ് എന്നറിയപ്പെടുന്ന മേൽക്കൂര.
രണ്ട് - ഫിനിഷിങ് ഘട്ടം.
ഈ ഘട്ടത്തിൽ ഉൾപ്പെടുന്നവ പ്ലാസ്റ്ററിങ്, ഫ്ളോറിങ്, പെയിന്റിങ്, കട്ടിള ജനലുകൾ, ഓടുമേയൽ തുടങ്ങിയവയാണ്. ഈഘട്ടത്തിലെ ഒരു പ്രശ്നവും കെട്ടിടത്തിന്റെ തകർച്ചയും ആയി ബന്ധപ്പെടുന്നില്ല.
എന്ന് വച്ചാൽ വീട് പ്ലാസ്റ്റർ ചെയ്യാതിരുന്നതുകൊണ്ടാണ് അത് തകർന്നു വീണത് എന്ന് ആരെങ്കിലും പറഞ്ഞാൽ അതിൽ ഒരു കാര്യവും ഇല്ല എന്നർത്ഥം, വീടിന്റെ ബലതന്ത്രപരമായ കണക്കു കൂട്ടലുകളിൽ പ്ലാസ്റ്ററിങ് സ്വപ്നത്തിൽ പോലുമില്ല.
അതിനാൽ നമുക്ക് ആദ്യ ഘട്ടം അതായത് സ്ട്രക്ച്ചറൽ ഘട്ടത്തെ പറ്റി മനസ്സിലാക്കാം, അതിലെ മൂന്ന് ഉപ വിഭാഗങ്ങളെപ്പറ്റി ചർച്ച ചെയ്യാം.
ഒരു കെട്ടിടം തകർന്നു പോയാൽ അത് " പൊളിഞ്ഞു വീണു, തകർന്നു വീണു " എന്നൊക്കെ നാട്ടുകാരും മാധ്യമങ്ങളും പറയും എങ്കിലും അതിനു " സ്ട്രക്ച്ചറൽ ഫെയിലിയർ" സംഭവിച്ചു എന്ന് എൻജിനീയർമാരും ആർക്കിടെക്ടുകളും പറയുന്നതിന്റെ കാരണം ഇതാണ്.
എല്ലാ കാര്യങ്ങളും കൂടി ഇന്ന് ചർച്ച ചെയ്യാൻ സമയം ഇല്ല, അത് നിങ്ങൾക്കും ബോറടി ഉണ്ടാക്കും, സമയത്തിന്റെ പ്രശ്നം എനിക്കുമുണ്ട്.
അതിനാൽ നമുക്ക് സ്ട്രക്ച്ചറൽ ഘട്ടത്തിലെ ഫൗണ്ടേഷൻ, സൂപ്പർ സ്ട്രക്ച്ചർ, റൂഫ് എന്നീ മൂന്ന് കാര്യങ്ങളിലെ ആദ്യ ഭാഗം, ഫൗണ്ടേഷൻ എടുക്കാം.
എന്താണ് ഫൗണ്ടേഷൻ ..?
കെട്ടിടത്തിന്റെ സമസ്ത ഭാരവും ഭൂമിയിലേക്ക് സുരക്ഷിതമായി കടത്തിവിട്ട് മൊത്തം കെട്ടിടത്തിന്റെ മേൽപ്പറഞ്ഞ ഈക്വലിബ്രിയം കാത്തു സൂക്ഷിക്കേണ്ട ഉത്തരവാദിത്തം ഉള്ള ഏറ്റവും പ്രധാന എലമെന്റാണ് ഫൗണ്ടേഷൻ.
എന്ന് വച്ചാൽ ഫൗണ്ടേഷന്റെ ഈക്വലിബ്രിയം പോയാൽ അതിനു മുകളിൽ നിൽക്കുന്ന സൂപ്പർ സ്ട്രക്ച്ചറിന്റെയും, റൂഫിന്റെയും ഈക്വലിബ്രിയം നഷ്ടപ്പെടും എന്നർത്ഥം.
നേരത്തെ പറഞ്ഞ മല്ലന്റെ കാര്യം പോലെ അതോടെ കെട്ടിടം മൂക്കും കുത്തി താഴെ പോരും.
പൊതുവെ മലയാളികൾക്കിടയിൽ ഒരു ധാരണ ഉണ്ട്,ഒരു വീട് പണിയുമ്പോൾ മെയിൻ സ്ലാബ് വാർക്കുമ്പോൾ ആണ് ഏറ്റവും ശ്രദ്ധ വേണ്ടത് എന്ന്.
അല്ല .. അല്ല ..അല്ല.
ഒരു കെട്ടിടത്തിൽ നിർമ്മാണം പൂർത്തീകരിച്ചു കഴിഞ്ഞാൽ പിന്നെ റിപ്പയർ ചെയ്യാൻ ഏറ്റവും ബുദ്ധിമുട്ടുള്ള സ്ട്രക്ച്ചറൽ എലമെന്റ് റൂഫ് ഓ, സൂപ്പർ സ്ട്രക്ച്ചറോ അല്ല.
ഫൗണ്ടേഷൻ ആണ്.
ഈ പറഞ്ഞതിനർഥം സ്ളാബിനു ഒരു പ്രാധാന്യവും ഇല്ല എന്നല്ല. അതിലേക്കു പിന്നെ വരാം.
ഫൗണ്ടേഷൻ ചെയ്യുമ്പോൾ എന്തെല്ലാം ശ്രദ്ധിക്കണം എന്ന് ചോദിച്ചാൽ അത് പറഞ്ഞു തീരാൻ ഒരു ദിവസം മുഴുവൻ മതിയാകില്ല.
എങ്കിലും ഓർമ്മയിൽ ഉള്ള, ശ്രദ്ധയിൽ പെട്ട ചില കാര്യങ്ങൾ പറയാം.
ഫൗണ്ടേഷന്റെ കാര്യത്തിൽ ചെലവ് നോക്കരുത്. കുട്ടനാട് പോലെ ഉള്ള സ്ഥലങ്ങളിൽ റാഫ്റ് ഫൗണ്ടേഷനോ, പൈൽ ഫൗണ്ടേഷനോ പോലെ ഉള്ള ചെലവേറിയ സംവിധാനങ്ങൾ വേണമെങ്കിൽ അത് ചെയ്യണം.
എന്നാൽ കട്ടിയേറിയ മണ്ണുള്ള കണ്ണൂരിലും, കാസർകോടിന്റെ ഭാഗങ്ങളിലും, ഉത്തര കേരളത്തിലെ മറ്റിടങ്ങളിലും പൊതുവെ ഇതിന്റെ ആവശ്യവും ഇല്ല.
എന്നാൽ ഈ ഇടങ്ങളിൽ ആണെങ്കിൽ പോലും ഫൗണ്ടേഷൻ ഉദ്ദേശിക്കുന്ന സ്ഥലങ്ങളിൽ പഴയ നികത്തിയ കിണറുകൾ, കുളങ്ങൾ, കല്ലുവെട്ടു ക്വറികൾ എന്നിവ ഇല്ല എന്ന് ഉറപ്പു വരുത്തണം.
തെങ്ങോ, മറ്റു മരങ്ങളോ പിഴുതു മാറ്റിയ ഫില്ലിങ്ങുകള് ഇല്ല എന്ന് ഉറപ്പിക്കണം.
പഴയ സെപ്റ്റിക് ടാങ്കുകളോ, മറ്റു കുഴികളോ ഉണ്ടെങ്കിൽ അതിനു വേണ്ടുന്ന പരിഹാരങ്ങൾ നിങ്ങളുടെ എൻജിനീയറുടെ ചർച്ച ചെയ്യണം.
അല്ലാതെ സോഷ്യൽ മീഡിയയുടെ അഭിപ്രായം തേടി പോകരുത്.
അഥവാ സോഷ്യൽ മീഡിയയിൽ നിന്നും ആരുടെയെങ്കിലും ഉപദേശം തേടുന്നു എങ്കിൽ അവർ ആരാണ്, അവരുടെ യോഗ്യതകൾ, പ്രവൃത്തി പരിചയം എല്ലാം പരിശോധിക്കണം.
പേന എടുത്തു ചിത്രം വരക്കുന്നവർ എല്ലാം എൻജിനീയർമാരോ ആർക്കിടെക്ടുകളോ ആവണം എന്നില്ല.
മനോഹരമായി വീടിന്റെ ത്രീഡി ചെയ്യുന്നവർ എല്ലാം സ്ട്രക്ച്ചറൽ എൻജിനീയറിങ് ബാലപാഠങ്ങൾ അറിയുന്നവരാവണം എന്നില്ല.
അതുപോലെ കോൺക്രീറ്റ് ഫൗണ്ടേഷൻ ചെയ്തു എന്ന് കരുതി വീട് സുരക്ഷിതമാവണം എന്നില്ല.
നിശ്ചിത ഗ്രെഡ്, ഡിസൈൻ എന്നിവ ഇല്ലാത്ത കോൺക്രീറ്റ് ഫൗണ്ടേഷൻ വാഴപ്പിണ്ടിപോലെ ദുർബലമാണ് എന്നറിയുക.
കരിങ്കല്ല് ഫൗണ്ടേഷൻ ചെയ്യുമ്പോൾ തീരെ ചെറിയ കല്ലുകൾ കൊണ്ടുവന്നു ഫൗണ്ടേഷൻ ട്രഞ്ചിൽ നിറയ്ക്കുന്ന കാഴ്ച ഇന്ന് കേരളത്തിലെ സൈറ്റുകളിൽ സർവ്വ സാധാരണമാണ്.
അനുവദിക്കരുത്.
" ഡ്രൈ റബിൾ മെയ്സൺറി " എന്ന സാങ്കേതിക നാമത്തിൽ അറിയപ്പെടുന്ന ഈ ജോലിക്കു കൃത്യമായ മാർഗരേഖകൾ ഉണ്ട്, ചെയ്യുന്നതിന് നിബന്ധനകൾ ഉണ്ട്.
അത് പാലിച്ചില്ലെങ്കിൽ ഈ പറഞ്ഞ ഇക്വലിബ്രിയം നഷ്ടപ്പെടും.
കെട്ടിടം താഴെ പോകും.
അപ്പോഴും പ്രബുദ്ധ മലയാളി " വീട് പണിയിൽ സിമെന്റ് കുറഞ്ഞു പോയതാണ്" എന്ന വിദഗ്ധ കാരണം കണ്ടെത്തി സ്വയം ആശ്വസിക്കും, മറ്റുള്ളവരെ ഉപദേശിക്കും.
ഒരു വീടിന്റെ സ്ട്രക്ച്ചറൽ ഭാഗങ്ങളിൽ അനുഭവപ്പെടുന്ന മർദ്ദങ്ങൾ എന്നത് കേവലം രണ്ട് മല്ലന്മാർ ചെലുത്തുന്ന ബലങ്ങൾ അല്ല.
അത് ഒരു പഞ്ചായത്തിലെ മൊത്തം ആളുകൾക്കും കൂടി ചെലുത്താൻ കഴിക്കുന്നതിനേക്കാൾ കൂടുതലാണ്.
ഒരു ഭിത്തിയിൽ ഒരു പൊട്ടലോ, വിള്ളലോ ഉണ്ടാകുമ്പോൾ അതിനു കാരണമായ അതി ഭീമമായ ഒരു ബലത്തെപ്പറ്റി ആലോചിക്കണം.
അത് എവിടെനിന്ന് വന്നു, എങ്ങനെ വന്നു, അതിന്റെ ദിശ, വ്യാപ്തി, അതുണ്ടാക്കിയേക്കാവുന്ന പ്രശ്നങ്ങൾ എല്ലാം അപഗ്രഥിക്കണം.
ഫൗണ്ടേഷനിലെ എല്ലാ കാര്യങ്ങളും ചർച്ച ചെയ്തു എന്ന് ഞാൻ കരുതുന്നില്ല. സൂചിപ്പിച്ചാൽ എനിക്കറിയാവുന്ന എളിയ കാര്യങ്ങൾ പങ്കുവെക്കാം.
അതിനപ്പുറം സമയം കിട്ടുമ്പോൾ സൂപ്പർ സ്ട്രക്ച്ചറിലേക്കും, റൂഫിലേക്കും തുടരാം ..
അതുവരേക്കും ശുഭയാത്ര ..
