Shield smart systems

20/08/2023

فني الكاميرات والتيار الخفيف عموماً ماينفعش تبقي ايده مشققه و اظافره مليانه طين او تراب بسبب الشغل.
احنا بنقابل ناس مهمة ...اصحاب شركات و سياسين و مسؤلين في الدولة و بنعملهم شغل في بيوتهم و اماكن عملهم.
لازم مظهرنا يكون كويس و اللي بيخلي العميل كمان ياخد انطباع جيد عنك.
الجوانتي مش بس بيحافظ علي ايدك ..دا بيحافظ عليك من اي تيار كهربائي ممكن تتعرض له لما تشتغل في موقع عمل.
الجوانتي بيحافظ علي نضافه الاجهزة و الكاميرات والحسابات اللي هاتسلمها للعميل و بيحافظ علي نظافه اماكن التركيب من سقف و حوائط ...علي عكس ايدك اللي بتبصم في كل حته و مش بتطلع بسهوله
خليك نظيف علشان يجيلك عميل بيقدر النظافه حتي لو كنت شغال في قرية نائية و الناس مش بتقدر دا.
الجوانتي دا تعتبره زي هدومك بالظبط و متقوليش متعودتش عليه...لازم تتعود عليه لانه فعلا بيفرق جامد
شكرا لاء شخص بيحافظ علي النظام وبيظهر
مظهر حضاري و مشرف

04/10/2021

ليه الهارد بيفصل تسجيل و هو جديد ؟
ببساطه شديده الهارد ديسك هو اكتر جزء حساس في السستم كله لانه بيشتغل علي اسطوانه من جوا و بيلف علي ابره رفيعه جدا عشان يسجل المعلومات الي بتدخل بشكل ما
عشان الهارد يسجل لازم الموتور يلف بانتظام عشان المعلومات الي بتتسجل تكون مترتبه في اماكنها الصح علي الاسطوانه الي جوا
كلام جميل لحد دلوقتي
اي الي بيخلي الهارد يفصل و خصوصا الجديد
لو جربت في مره تشغل هارد جديد علي باور ضعيف هتلاقيه بيشتغل و يفصل خالص لدرجه انك بتمسك الهارد بتلاقيه فاصل و بتفتكر ان الوصلات فيها مشكله

التركايا هنا بقا
لما الباور بيضعف معاك الموتور عدد لفاته بتقل
فالمعلومات الي داخله مش بتتسجل بانتظام و ده غلط
فابتلاقي الهارد بيتقل في التسجيل و بيقطع و اوقات بيفصل

طب ليه بيفصل ؟!
لان الهاردات الجديده فيها زي حساس
لما يحس ان الباور مش منتظم بيفصل خالص الباور عن الهارد عشان ميحصلش مشكله في الاسطوانه
عشان كده اول حاجه بنعملها بنغير باور لما الهارد بيفصل

اي الي بيخلي الهارد يبوظ بسرعه ؟
1 انه يشتغل مع كاميرات علي نفس الباور
لانه لحظة تشغيل الليد بتاع الكاميرا بتسحب امبير اعلي و ده بيخلي الكهرباء الي داخله للهارد مش مستقره

2 حركة الهارد و هو شغال
ده بيخي الاسطوانه تتجرح من ابرة القراية

3 باور ضعيف
بيخلي الموتور يلف بطريقه مش مستقره

ياريت ناخد بالنا 👌

19/09/2021

قواعد كاميرات المراقبة الاربعون

1-متركبش هارد مستعمل للعميل ولا ريفيربرشد
2-اختار العميل قبل البضاعة
3-خليك صادق و امين مع العميل دايما
4-اعمل تست للبضاعة قبل ما تروح تركبها
5-متروحش تتعلم التركيب عند العميل لو هتشتغل في حاجة جديدة عليك
6-تستر الكاميرات بيخلي العميل ياخد انطباع الاحترافية عنك
7-العميل مش خبير كاميرات ف لما يشتكي من حاجة في التليفون.. لازم تروح تشوف بعينك المشكلة لانك هتتصادف ان المشكلة من حاجة هايفه.
8-متركبش هارد مستعمل للعميل ولا ريفيربرشد ولا اللي عليه ضمان تست.
9-التوفير للعميل هيجي علي دماغك بعدين لو بياخد ضمان مجاني بعد التركيب.
10-العميل اللي بيورد البضاعة بنسبه كبيرة عميل متعب
11-متسمعش و متصدقش السيلز فنيا ...هما مش مهندسين ولا فاهمين حاجة غير انه يحقق التارجت و دا مش عيب.
12-حافظ علي عميلك المحترم الغني ...من جاور السعيد يسعد.
13-لو عميلك واحدة ست...أهرب يا مجدي.
14-لو عميلك قالك تعالا نروح نشتري البضاعة سوا...أهرب انت و مجدي و اللي خلفوا مجدي.....خبرة السنين في اختيار البضاعة مش ببلاش.
15-ابعد عن البراندات المحروقة قدر المستطاع...بتخسر مبتكسبش.
16-مواعيدك المظبوطه مع العميل في التركيب و الصيانة بتدل علي احترامك ليه.
17-خلي معاك شنطة عدة اضافية ...لانها وارد تضيع منك...ف مش هنعطل عليها.
18-اعرض علي العميل الحاجة الغاليه الكويسة الاول و بعدين اعرض عليه السعر الاقل .....علم التسويق بيقول كده.
19-ميصعبش عليك حد هيركب كاميرات مراقبة...هو مش فقير بيشتري دوا بواسير....خد حقك و اديله حقه.
20-لو عاوز تخزن شغل...خزن اكسسوار...لا بيخسر ولا بيتحرق ولا بيقدم, انما كاميرات و اجهزة لأ.
21-قولنا الهارد المستعمل لأ و اسمع الكلام.
22-البراندات مش جاية من الفضاء...هما صرفوا جامد عالاعلانات علشان يوهموك انهم الافضل.
23-متتصورش مع الوفد الصيني....لانهم مش بيعصروا لمون علي شوربه الخفاش.
24-اعمل في حسابك دايما ان الدعم الفني لأي شركة بشر زيك ف بشويش عليهم علشان هما مشدودين دايما.
25-لما تلاقي زميل ليك بينافسك و بيحط سعر اقل منك لعميلك...سبهاله خالص مخضرة,ربنا اللي بيرزق مش الناس.
26-البراندات منتجاتهم حلوة جدا لحد لما تاخد الخازوق المحترم.
27-اي حد في المجال لسه بيتعلم مهما كانت خبرته.
28-اتقان العمل شئ محبب الي الله....عامل الله اولا و سيبك من البشر.
29-مجال التيار الخفيف مليان ناس محترمة...خليك زيهم لان اللي غير كده بياخد استمارة 6 من المجال بدري.
30-طور نفسك و اعرف الجديد علطول و خد كورسات بالفلوس...هتكسب اد اللي دفعته تسعين مرة.
31-العلاقات هي اللي بتجيب شغل...و العلاقات بتيجي ب ادبك و احترامك للناس.
32-الصبر بيعلم كتير...اصبر علي نفسك و انت بتتعلم حاجة جديدة.
33-البراند اللي بيتحرق... بيحرق اللي يشتغل فيه كمان.
34-مش هتبقي غني غير لما تبقي سمعتك كويسة بين الناس.
35-عرض الاسعار خليه 3 عروض...غالي و وسط و رخيص.
36-العميل بيقتنع بالصورة اللي هيشوفها مش بالصورة اللي هتتكلم عنها.
37-العميل اللي يفاصلك بعد التركيب ...فاصله في الضمان.
38-اكتب كل تفاصيل التركيبات اللي بتركبها في اجندة....بالتاريخ و التكلفة و العنوان و رقم التليفون الخ الخ ...هتحتاجهم في يوم من الايام.
39-الفني اللي عاوز يعمل اعلان لنفسه عند العميل بيركب اكسسوار محترم.
40-السعر القليل مش كل حاجة....اسئل دايما ايه المميز في المنتج الغالي.

13/05/2021

13/01/2021

علشان محدش يضحك عليك (الجزء العاشر)
كيف يعمل الهارد ديسك ؟و ما معني كل لون من الوانه

في البوست دا هيكون كلامنا عن منتجات شركة ويسترن ديجتال عملاق صناعة الهارد ديسك.

اولا خلينا نشرح الهارد ديسك بيشتغل ازاي؟
الهارد ديسك و خلينا نقول عليه "الميكانيك هارد" عبارة عن مجموعة من الاسطوانات المعدنية الرقيقة جدا اللي بيبقي عليها فيلم مكون من حبيبات معدنية ممغنطة لا تري بالعين المجردة
و فوق كل اسطوانة أبرة و علي كل أبرة رأس لقراءة و كتابة البيانات من علي كل اسطوانة
و كل اسطوانة علشان تشتغل بتبقي متركبة علي موتور صغير بيلف عدد لفات معينة RPM
يعني revolutions per minute
بالعربي يعني (لفات في الدقيقة)
الهارد بيقوم بتخزين اي معلومات علي هيئة طاقة مغناطيسية متوزعة بشكل معين علي سطح الاسطوانة.
ف لما حضرتك بتخزن داتا معينة ...بتتحول من طاقة كهربائية ل طاقة مغناطيسية و لما حضرتك تستدعي الداتا دي ...الطاقة المغناطيسية دي بيحولها لـــ أشارة كهربائية ديجيتال يعني عبارة عن (وحايد و اصفار) و دي اللي بنقدر نحولها ل معلومة مرئية او مسموعة بعد كده.
كل يوم عمالين يطوروا في الفكرة دي لحد لما وصل للهارد اللي اسمه SSD
ودا اختصار لــــ Solid-State Drive
و بالعربي كده يعني قرص الحالة الصلبة و دا بيبقي هارد صامت لا يحتوي علي اقراص ولا رؤس قراءة و لا اي شكل من اشكال الهاردات الميكانيكية القديمة و سعره غالي مقارنة بالهارد المعدني و تقدر تقول عليه "فلاش ميموري" بس حجمها كبير 😅

ايه بقي قصة الالوان بتاعه الهاردات دي؟
الشركة بتاعة ويسترن ديجيتال قالت انا هستهدف السوق تجاريا بس اقسم العملاء حسب احتياج كل واحد فيهم الاول.

يعني فيه عميل ال PC و دا بيحتاج هارد ديسك بسيط لتخزين الداتا
و فيه العميل بتاع الالعاب و دا بيحتاج هارد ديسك سريع
و فيه عميل السيرفرات و دا بيحتاج هارد كبير و سريع جدا
و فيه عميل كاميرات المراقبة اللي عاوز هارد سريع نسبيا و يشتغل 24 ساعة
و عليه قرروا يعملوا كل هارد بخصائص ميكانيكية معينة
يعني يعمل مرة الموتور بسرعة 5400rpm و مره يعمله 7200rpm ودا اكيد هيأثر في اداء الهارد و سعره و بالتالي هيعرف يعمل كل منتج حسب الاحتياج بدون تكلفة زيادة.
و طبعا مننساش الكاش ميموري اللي بتعمل عمليه تنظيم ل نقل الداتا من الهارد الي الرامات و البروسيسور و بتكون مسئولة عن سرعة استجابه الهارد برضه.
خليني ألفت نظرك لحاجات بتحصل معانا
لما تيجي تنفخ التراب اللي في جهازعليه هارد ديسك...بأستخدام البلاور ...حاول تنفضه من بعيد لأن موتور البلاور الردئ الصنع بيطلع طاقة مغناطيسية بتأثر علي الداتا اللي موجودة علي الهارد و تشوهها و ممكن يخليك تعمله فورمات و الموضوع دا حصل مع صديق شخصي لدرجة انه افتكر ان النضافه بتأثر علي هارد الكمبيوتر هههههههه

لاحظ كمان ان لو عندك جهاز كمبيوتر فيه هاردين ...ولما تيجي تدخل علي الهارد التاني بتلاقي الجهاز يركن كده ثواني علي ما يستجيب و يبتدي يشتغل معاك
في الوقت دا بيكون الهارد في وضعية انه ظاهر بس عدد لفاته قليلة ف بيحتاج انه يشتغل بسرعة الدوران بتاعته الاساسيه الاول علشان الابرة تقدر تاخد من عليه الداتا .
و طبعا علشان هو هارد ميكانيكي ف بياخد حبة وقت علي ما يقاوم الكتله بتاعته.
بص يا سيدي

الهارد الاخضر و هو ارخص موديل ....معمول علشان التخزين بشكل اساسي ..عدد لفات قليله 5400 لفة في الدقيقة و كاش 64 ميجا و معمول علشان وقت استخدامك للهارد ميكونش طويل ...يعني يدوب تسحب معلومة في توقيت صغير و الهارد يرجع لحالة قريبة من الثبات و دي طبيعة استخدامنا لأي كمبيوتر شخصي بسيط.

الهارد الازرق حاطينه في النص يعني موتور عادي 5400 لفة بس موتور اقوي شوية علشان استجابته تكون سريعة لما تستدعيه و علشان يبقي بسعر مناسب و منافس في السوق.

الهارد الاسود 7200 rpm معمول علشان الاستخدام الشخصي القوي...يعني لو انت بتحتاج معلومات من علي الكمبيوتر ف عاوز موتور صغير و قوي علشان يعمل معاك بشكل سريع و مناسب و بيكون مناسب للجيمرز

الهارد الاحمر و دا هارد بموتور 5400 لفة في الدقيقة و دا مخصص لـــ NAS وبيكون ب كاش 64 ميجا.

الهارد الذهبي و دا بكاش 128 MB و بيكون وزنه تقيل جدا بسبب حجم الهيد اللي عليه و حجم الاسطوانات الداخلية و عددها و دا بيكون هارد للداتا سنتر.

طبعا البنفسجي بتاعنا ب كاش 64MB و دا للتخزين و مش محتاج موتور قوي جدا ...يدوب 5400 لفة كويسة علي شغلنا بس هما عاملين نقطة معينة و هو انه يشتغل 24 ساعة!!!
و 24 ساعة يعني هارد فاقد لدرجة الحرارة الناتجة عن عملية التسجيل الدائم او التشغيل الدائم.
ف هو في التصميم الداخلي له ....المؤكد ان الشركة صممته علي انه يمتص الحرارة و يخرجها برا لأن ....

لو حضرتك جبت مغناطيس عادي و عرضته للحرارة...هيفقد الطاقة المغناطيسية بتاعته و دا اللي ممكن يحصل مع الهارد ديسك لو اتعرض لدرجة حرارة عالية

ف متفتكرش نفسك ناصح لما تجيب هارد مستعمل اخضر او ازرق فيه موتور جايب جاز و مستهلك تمام علشان توفر فلوس
لما يدخل عليك الصيف و تكون درجة الحرارة شديدة ...هتزعل اوي علي الفلوس اللي راحت.

تحياتي

14/12/2020

انظمه التحكم في الدخول والخروج عن طريق سيستم UHF بالاضافه لسوفت وير كامل

29/11/2020

من اهم اعمال شركه شيلد للانظمه الذكيه
نظام كاميرات المراقبه التليفزيونيه

08/09/2020

دليلك علشان تشتري نظام مراقبة و انت مطمن
اول حاجة تاخد بالك منها ان كاميرات المراقبة مش سلعة ترفيهية
دي سلعة خدمية ...بتبقي محتاجة متابعة دايمة منك او من شخص ينوب عنك
كمان هي سلعة بتستخدم في تأمينك ال 24 ساعة...يعني حضرتك محتاج انظمة مراقبة يعتمد عليها و تكون اعطالها قليلة
كمان حضرتك محتاج يكون ليها قطع غيار متوفرة بشكل دايم و كمان الضمان يكون ضمان قوي لفترة طويلة....و كمان مينفعش تعتمد علي نظام لتأمينك و النظام دا ممكن يقع في لحظة .
كل ما سبق متقدرش تشتريه بأقل سعر ابدا ابدا ابدا
أقل سعر هيجبلك منتج ردئ أوي لا له ضمان ولا صيانة ولا حتي الفني اللي هيركبهولك هيتابع معاك
بعض الفنين بيركبوا انظمة المراقبة ب هارد ديسك مستعمل و دا اللي أسمه كارثة بكل المقايسس لان عمر الهارد ديسك دا قصير اوي اوي
بالمختصر المفيد...بلاش تخلي أقل سعر يغريك
اهم حاجة
جودة الصورة
جودة خدمة ما بعد البيع من الفني المكتب او الشركة اللي هتركبلك
المتابعة و الصيانة الدورية لنظام المراقبة
و بالتوفيق ليك.