26/07/2026
هتصدقني لو قولتلك الصورة دي أنا شوفتها قبل ما المكان يبقى موجود ؟
من أول مابدأت أفكر في إعادة تقسيم الفيلا وقت ما كانت لسه مجرد مساحات فاضية وسكيتشات على ورق.
لكن وأنا ببص للمكان، تخيلت نفسي قاعد في الجاكوزي... ببص علي اللاندسكيب، وحاسس إن الدنيا كلها وقفت شوية وصوت "وجيه عزيز" في الخلفية بيقول ( من حقنا نحلم ول كده كده ,,, و نشوف الدنيا حلوة مع أنها مش كده)
الصورة دي فضلت في دماغي طول فترة الشغل.
وبين اللحظة دي واللحظة اللي صورت فيها نفس اللقطة، كان فيه مئات التفاصيل، وعشرات المشاكل اللي كان لازم تتحل، وقرارات بتتاخد كل يوم.
يمكن دي من أحلي لحظات في شغلنا...
إنك بتقضي شهور بتحاول تنفذ صورة محدش شافها غيرك.
ولما المشروع يخلص، تكتشف إنك واقف في نفس المكان... بتصور نفس المشهد اللي كان مجرد خيال في أول يوم.
يمكن علشان كده أكتر لحظة بستمتع بيها مش لحظة تسليم المشروع... لكن لحظة إني أتأكد إن الصورة اللي كانت في دماغي بقت حقيقة
