08/06/2026
驗樓唔係製造問題，而係將原本存在嘅問題揭露出嚟。
近年AI發展一日千里，好多人都問：將來AI會唔會取代Surveyor？ 我嘅答案係：至少現階段，仲有一樣好重要嘅嘢，AI未必做到。就係經驗同判斷。
最近驗樓時遇到一個幾典型嘅例子。現場見到浴室牆身有一大幅重新批灰及油漆修補痕跡，手工唔算理想，明顯曾經維修過。而更有趣嘅係，正正喺浴室下面嗰層房間，相同位置嘅天花亦有一大片類似嘅修補痕跡。
一般情況下，呢啲位置都會令人聯想到過往曾經發生滲漏。於是我哋進行濕度測試。
結果？
全部正常，濕度正常，冇水痕，冇即時滲漏。如果單靠儀器數據，可能好多人已經會覺得冇問題。
但經驗話畀我知，事情未必咁簡單。因為正常人唔會無緣無故將浴室牆身同樓下天花同時大面積修補，於是繼續測試。我哋持續放水超過十五分鐘，甚至將浴缸注滿一缸水進行壓力測試。
結果終於出現。
樓下天花開始滲水，問題成功被重現。
買家當場就清楚知道問題所在，亦可以評估維修成本同風險。其實Surveyor嘅工作唔單止係發現問題，更加重要嘅係將多年累積落嚟嘅經驗，整理成一本屬於買家嘅「說明書」。
講你知：
點樣避免問題；
問題出現時點樣處理；
以及呢個問題將來可能帶來咩風險。
當然，工作仲未完。之後我哋仲要向業主同地產代理解釋，點解驗樓之前冇事，驗樓之後反而出現明顯滲漏。
事實上，過去一星期，我哋花咗唔少時間同業主及代理溝通。因為由佢哋角度睇，問題好似係驗樓後先出現。
但由專業角度睇，其實只係透過測試將原本隱藏嘅缺陷重現出嚟。
我哋嘅工作價值，就係喺你簽約之前，盡量將呢啲隱藏喺牆後面、天花上面、甚至文件裡面嘅問題，搵出嚟。
