24/09/2020
UZO Behiang Block Executive Member oath taking um;
By-Election um ding ah koipou in panla tha chiet ding in UZO President in ngen
Lamka, September 23: Nam a buoiseng chieng ahiei, ahisih leh akiet ngiem ding chieng in Pasian hing kigol ahi chi’a Psalm Laibu in a gen bang in mailam hun a By-Election um ding pen mimal hamphatna ding khop a etla huoilou ahi’a, hinanleh Nampi damna ding a Pasian in a lemguot ahi chi’a koipou in lah a tuachi’a panla tha ding chi’n Chinlunthang, President, UZO GHQ in tuni’a Zou Gal Memorial Cemetery Complex, Behiang a um Oath Taking Ceremony of UZO Behiang Block Executive Member & Launching of Zotal Royal Riders T-Shirt program hun ah gen hi.
UZO GHQ in apeisa February 29, 2020 ni’a Tuibuong a Special Assembly anei hun a Zomi Council toh kizopna asuh tawp toh kituoh in UZO GHQ leh Zomi Council, ZYO leh Zomi Youth Association (ZYA), ZSP leh Zomi Students Federation (ZSF) in kizopna nei nawnlou ahina ah tuami toh kisai pawlpi te’n Zou tate tung ah thuneina anei theisih ding chi koipou in lungsim a nei a, peipi ding chi’n zong gen hi.
UZO GHQ pen Behiang area mipi a ding a ding gige ahina ah koima thomhaulou ding leh Koima’n na tung ua gen-le-sah anei theisih ding chi zong UZO GHQ stand point hi gige ahidan gen in koima chou lou ding, koima sil zong lapieh lou ding leh Nam a kichien ding chi’n theisah hi.
Aman agenzelna ah MLA power toh January 25, 2020 ni’n Zou sung keh 2 suo a um leh mailam hun a Assembly a palai sawl theilouna ding a gamgi gitthana, delimitation um thei ding pen MLA power ma toh nang leh dalna ding a koipou in theitawp suo vai chi’n genbe hi.
Program hunsung in Thangzamang, Jt. Secretary, UZO/GHQ in UZO Behiang Block Executive Member tha mi 4: (i) Mangngamlian of Hiangtam-V, Secretary (Organization), (ii) Khamlunpau of Behiang, Finance-cum-Treasurer, (iii) Pauminthang of Suangphu, Secretary leh (iv) S. Kamzamang of Behiang, Vice President te kichiemsahna nei a, Upa Vungkhanpau of Behiang in thumsahna nei hi.
Tualeh President, UZO GHQ in Zotal Royal Riders T-Shirt honna nei hi.
Tuni’a Zou Gal Memorial Cemetery Complex, Behiang a um Oath Taking Ceremony of UZO Behiang Block Executive Member & Launching of Zotal Royal Riders T-Shirt program hun KG. Tungnung, General Secy. UZO/GHQ leh Upa Suankhanmang, Ex-President, UZO/GHQ, Nangzathang, President, ZYO GHQ leh Nengkhosoi Phiamphu, President ZSP/GHQ leh Jubilee Mawi, Chief of Behiang te zong thugenna sau loulou nei uhi. (Zogam Today)
