20/05/2026
மெழுகுவர்த்தி வெளிச்சத்தில் உலக சாதனை - ஜெர்மனி கிராண்ட்மாஸ்டரை வீழ்த்திய சிவகாசி சிறுவன் தமிழமுதன்!
தமிழகத்தின் சிவகாசி (திருத்தங்கல்) பகுதியைச் சேர்ந்த 8 வயது சிறுவன் தமிழ் அமுதன், உலக சதுரங்க அரங்கையே வியப்பில் ஆழ்த்தியுள்ளார். ஆன்லைன் மூலம் நடைபெற்ற Freestyle Friday பிளிட்ஸ் சதுரங்கப் போட்டியில், உலகின் 7-ஆம் நிலை வீரரான ஜெர்மனியின் கிராண்ட்மாஸ்டர் வின்சென்ட் கெய்மரை வீழ்த்தி தமிழ் அமுதன் அபார வெற்றி பெற்றுள்ளார்.
போட்டி தொடங்குவதற்கு முன்பாக சிவகாசியில் பலத்த இடியுடன் கூடிய மழை பெய்ததால், தமிழ் அமுதனின் வீட்டில் மின்சாரம் துண்டிக்கப்பட்டது. லேப்டாப்பில் 48 சதவீத பேட்டரி மட்டுமே இருந்த நிலையிலும், பின்வாங்காத சிறுவன், தனது தாயாரின் Hotspot இன்டர்நெட்டைப் பயன்படுத்தி போட்டியில் பங்கேற்கத் துணிந்தார்.
மின்சாரம் இல்லாததால், சதுரங்க இணையதளத்தின் விதிகளைப் பூர்த்தி செய்ய (முகத்தை இணையக் கேமராவில் காட்ட) ஒரு மெழுகுவர்த்தியையும், மொபைல் டார்ச் வெளிச்சத்தையும் அவர்கள் பயன்படுத்தினர். தரையில் அமர்ந்து, மடியில் ஒரு தலையணையை வைத்து அதன் மேல் லேப்டாப்பை இயக்கியபடி, இந்த இக்கட்டான சூழலிலும் உலகத்தரம் வாய்ந்த வீரரை தமிழ் அமுதன் அதிரடியாக வீழ்த்தினார்.
9 வயதுக்குட்பட்டோருக்கான உலகளாவிய சதுரங்க தரவரிசையில் தற்போது முதலிடத்தில் இருக்கும் தமிழ் அமுதன், 2000 எலோ புள்ளிகளைக் கடந்த மிக இளம் வயது கேண்டிடேட் மாஸ்டர் என்ற பெருமையைப் பெற்றவர் ஆவார். தற்போது இவர் கிராண்ட்மாஸ்டர் குகேஷின் முன்னாள் பயிற்சியாளரான விஷ்ணு பிரசன்னாவிடம் 'ஹட்சன் செஸ் அகாடமி'யில் பயிற்சி பெற்று வருகிறார்.
தமிழ் அமுதன் மட்டுமின்றி, லண்டனில் வாழும் திருச்சி பின்னணியைக் கொண்ட 10 வயது சிறுமி போதனா சிவானந்தன், சென்னையின் ஆர். பிரக்ஞானந்தா, டி. குகேஷ் என ஒட்டுமொத்த செஸ் உலகையும் தமிழ் வம்சாவளி இளம் நட்சத்திரங்கள் தற்போது தங்களின் அசாத்திய திறமையால் ஆக்கிரமித்து வருகின்றனர்.
