14/02/2026
കഥയറിയാതെ ആട്ടം കാണുന്ന, നീതിബോധ മില്ലാതെ പ്രതികരിക്കുന്ന, മതേതര അപകർഷത കൊണ്ട് പേര് നോക്കി വെളുപ്പിക്കുന്ന വികലമനസ്‌കരാണ് ഇപ്പോൾ സോഷ്യൽ മീഡിയയിൽ അധികവും!
പിതാവിന്റെ സാന്നിധ്യമില്ലാതെ വളർന്ന, ദാരിദ്ര്യം മറികടക്കാൻ മാതാവിന് കുട്ടികളിൽ നിന്നകന്നു ജോലിക്ക് പോവേണ്ടി വന്ന, വലിയമ്മയുടെ കൂടെ താമസിച്ചു വരുന്ന കുട്ടി! വിളച്ചിലോ കാപട്യങ്ങളോ തിരിച്ചറിയാൻ കഴിവ് കുറവുള്ള ഈ പാവം പെൺകുട്ടി തന്റെ,ലോക പരിചയമോ യാത്രാ പരിചയമോ ഇല്ലാത്ത വല്യമ്മയുടെ കൂടെ ഒരു പേര് കേട്ട മനുഷ്യന്ന് മുൻപിൽ സൽസ്വഭാവ ശാക്തീകരണത്തിനായി ഹാജറാക്കപ്പെടുന്നു! കുട്ടിയുടെയും കൂടെയുള്ള ആളുടെയും ദൗർബല്യങ്ങൾ പെട്ടന്ന് മനസ്സിലാക്കിയ ‘വലിയ’ ആൾ കുട്ടിയെ കുറച്ചു ദിവസം കൂടെ താമസിപ്പിച്ചു മോട്ടിവേറ്റ് ചെയ്ത് ഉഷാറാക്കാമെന്നു വിശ്വസിപ്പിക്കുന്നു! വലിയ ആളെ കുറിച്ച ഒരു പരിചയക്കാരന്റെ ഉറപ്പിൽ വലിയമ്മ സമ്മതിച്ചു മടങ്ങിപ്പോകുന്നു! ക്ലാസ് കേൾപ്പിക്കാൻ എന്ന പേരിൽ കുട്ടിയെ രക്ഷിതാക്കൾ അറിയാതെ കൊണ്ട് പോയി ഹോട്ടലിൽ താമസിപ്പിക്കുന്നു. ദിവസങ്ങൾക്കകം കുട്ടി തന്നെ തിരികെ കൊണ്ട് പോകണമെന്നു കരഞ്ഞു കേഴുന്നു! കുട്ടിയെ തിരികെ കൊണ്ട് വരുന്നു. സംഭവങ്ങൾ അറിഞ്ഞു ആ കൊച്ചു കുടുംബം തളരുന്നു! ആരോരുമില്ലാത്ത, നിയമ വഴികളെ കുറിച്ചു ഭയം മാത്രം ഉള്ള, ആ നിസ്സഹായ കുടുംബം കുട്ടിയുടെ ഭാവി അപകടപ്പെടാതെ ‘വലിയ’മനുഷ്യന്റെ വഞ്ചനയെ എങ്ങനെ നേരിടണമെന്ന് അറിയാതെ അലയുന്നു! ഒടുവിൽ കാര്യങ്ങൾ ഒരു ബന്ധു മുഖേന ഒരു പോലീസ് ഓഫീസർ അറിയുന്നു! കുട്ടിയുടെ ദുരിതങ്ങൾ തന്റെ മകൾക്കാണെങ്കിൽ താൻ എന്ത്‌ ചെയ്യുമായിരുന്നു എന്ന് ചിന്തിച്ച ആ പോലീസ് ഓഫീസർ ആ കുട്ടിക്ക് അച്ഛന്റെ കരുതലും ധൈര്യവും കൊടുത്തു! ആ കുടുംബത്തിന് പിന്തുണ നൽകി രക്ഷകനായി! പക്ഷേ സോഷ്യൽ മീഡിയയിൽ ദൈവ ഭയമോ നീതിബോധമോ വസ്തുത അന്വേഷിക്കാനുള്ള ക്ഷമയോ ഇല്ലാതെ നിറഞ്ഞാടുന്നവർ ആ കുട്ടിയേയും കുടുംബത്തെയും പോലീസ് ഓഫീസറെയും മയക്കുമരുന്ന് മാഫിയയാക്കി വീണ്ടും വേട്ടയാടുന്നു! ആ കുട്ടിയെയും കുടുംബത്തെയും കണ്ണീരു കുടിപ്പിച്ചു കൊന്നേ ഇവർ അടങ്ങൂ! പിന്തുണച്ചില്ലെങ്കിലും ദ്രോഹിക്കാതിരുന്നു കൂടെ! പോലീസ് കള്ളക്കേസുകൾ എടുത്തു അതി ക്രൂര വേട്ട നടത്താറുണ്ട്! പലരും എത്രയോ വ്യാജ പോക്സോ കേസുകളും വ്യാജ പീഡന ആരോപണവും മെനയാറുണ്ട്! അത് വഴി ജീവിതം തകർക്കപെട്ടവർ എന്റെ അറിവിൽ തന്നെയുണ്ട്! തെറ്റ് ചെയ്തവരും ചെയ്യാത്തവരും ചേർന്ന്, നിസ്സാര അബദ്ധങ്ങളെയും സ്പർശനങ്ങളെയും പോലും പർവതീകരിച്ചു ആക്രമിക്കാറുണ്ട്! തെറ്റുകൾ മനുഷ്യർക്ക്‌ പറ്റും! സാഹചര്യങ്ങൾ ആരെയും പിശാചാക്കി മാറ്റാം! പക്ഷേ ഈ ആനുകൂല്യങ്ങൾക്കൊന്നും അർഹതയില്ലാത്ത, അതി ക്രൂരവും നിരന്തരവും അങ്ങേയറ്റം ചൂഷണാത്മകവും ആയ കാര്യങ്ങൾ ഇവിടെ നടന്നതായറിയാം ! അപ്പോൾ ആരോടൊപ്പമാണ് നിൽക്കേണ്ടത്! കൂടെ നിന്നില്ലെങ്കിലും കാര്യം പഠിക്കാതെ ആ കുടുംബത്തെയും പോലീസ് ഓഫീസറെയും മയക്കുമരുന്ന് മാഫിയ ആക്കാൻ എന്താണ് നിങ്ങൾക്കുള്ള അവകാശം!
