17/05/2024
SAN DUMMINICO MAGGIORE
Pusilleco? E vva bbuò’,se vede ‘o mare,
me fa sentì nu poco ‘mparaviso;
si me ne scengo abbascio Marichiaro,
s’appoja ‘ncopp’ a cchist’uocchie nu surriso.
So’ bbelli poste,ma sinceramente,
io preferisco ‘e vicarielle astritte,
addò se sente ‘o sciato ‘e tanta ggente,
‘e chi suspira e cchi se sente affritto.
‘Sti vicarielle so’ ttanta venelle
e ‘o còre è San Dumminico Maggiore;
nce vaco comm’ a nu ‘nnammuratiello,
quanno me piglia ‘e Napule ll’ammore.
E spicialmente quann’è pprimmavera
e ‘o sole tira ‘a ggente ‘a dint’’e ccase;
sto ssulo ‘mmiezz’ a ttante e stongo allèro
comme si avesse avuto ‘o primmo vaso.
Scaturchio arape ‘e pporte e gghiesce fora
ll’addore de’ sfugliate e dde’ bbabbà;
sto ssotto a ll’obbelisco,e ‘ncopp’’o còre,
me scenne tutt’’o ddoce ‘e ‘sta città.
