25/06/2020
සිංහලයන් වී වැව්වේ බඩගින්න නිවන්නම නෙවෙයි
සහල්වල රන් අඩංගු නොවේ. ‘හයිබ්රිඩ් වී’ නිපදවන සමාගමක් තම අලුත් සහල් විශේෂය ‘ගෝල්ඩන් රයිස්’ යයි නම් කිරීම වෙළෙඳ උපායකි. ඒ නම අසන සහල් පාරිභෝගිකයෝ අලුත් හාල් වර්ගය ගැන දැන ගැනීමට උනන්දු වෙති. සමාගම අලුත් සහල් පිළිබඳව කරන වෙළෙඳ ප්රචාරයේ තරමට පාරිභෝගිකයෝ ඒවා මිලයට ගැනීමට පෙලඹෙති.
ඉන්දු ගංගාව ආශ්රිත ප්රදේශයන්හි ගොවීන් වගා කළ සිය ගණනක් වී වර්ග වඳකර ‘බාස්මතී’ පැතිරවීමට හයිබ්රිඩ් සමාගම්වලට හැකිවිය. ‘හරිත විප්ලවය’ ඇරඹි කාලයේ නිපදවූ, වැඩි අස්වැන්න දෙන පෝෂණයෙන් පිරුණ සහලක් වශයෙන් කීර්තිය ලැබූ බාස්මතී කෑමෙන් දියවැඩියාව වැනි රෝග වැලඳෙන බව සඳහන් ලිපි දැන් පාකිස්තානය, ඉන්දියාව වැනි රටවල පුවත් පත්හි දක්නා ලැබේ. කීරි සම්බා මෑත කාලයේ ලංකාවේ ජනප්රිය වූ හයිබ්රිඩ් හාලකි. ඒවා කෑමෙන් දියවැඩියාව හැදෙන බව දැන් බොහෝ දෙනා කියති.
ඉන්ගෝ පෙට්රිකුස් සහ පෙටා බයර් නමැති අභිජනන විද්යාඥයන් දෙදෙනා ජාන තාක්ෂණය ආධාර කරගෙන 1990 වසරේ හයිබ්රිඩ් වී වර්ගයක් නිපදවූහ. ඊට මුදල් යෙදවූයේ, පිලිපීනයේ ජාත්යන්තර සහල් පර්යේෂණ ආයතනය පිහිටුවූ ඇමරිකාවේ රොක්පෙලර් ආයතනයයි. මෙම සහල් වර්ගයට ‘ගෝල්ඩන් රයිස්’ යන නම තබන ලදී. කැරටින් අඩංගුවීම සහ කහ වර්ණයෙන් යුක්තවීම නිසා සහලට ඒ නම හිමිවූ බව ඔවුන්ගේ වෙළෙඳ ප්රචාරණ ලිපි ගණනාවක සඳහන් වේ.
ඇමරිකාව ප්රධාන බටහිර රටවල් කරන දේ අනුකරණය කිරීම යටත් විජිත වශයෙන් පැවති රටවල් බොහෝමයක පඬියන්ගේ සිරිතයි. ලෝකයේ සහල් නිපදවන රටවල අභිජනන විද්යාඥයන්ට ‘ගෝල්ඩන් රයිස්’ නිපදවීමේ උමතුව වැලඳීමට ප්රධාන හේතුව ඔවුන්ගේ බටහිර ගැතිකමයි. මෙවැන්නන් බොහෝ දෙනකුගේ මොළ, පිලිපීනයේ සහල් පර්යේෂණ ආයතනය -ඊරි- විසින් පිළියෙල කරන ලද්දේ වෙයි. ඒවායේ ජාතික හැඟීම් නූපදී.
වී ගසේ උපත පිළිබඳ කතාන්දර තිබේ. බටහිරුන් හදා ඇති කතාන්දරවල ස්වභාවය ඒවා විද්යාත්මක විවරණයන් වශයෙන් සැලකීමයි. වී පැළය චීනයේ හෝ ඉන්දියාවේ ගංගාශ්රිතව වැවුණු කතාව නිදසුනකි. බෞද්ධයන්ගේ කතාන්දර සැලකෙන්නේ මිථ්යා ප්රබන්ධ (මිත්ස්) වශයෙනි. දරුවන් කෙරෙහි ප්රේමය ඇති ‘ක්වාන්යින්’ බෝසත්වරිය වී ඇටය කිරෙන් පිරවූ කතාව නිදසුනකි. හයිබ්රිඩ් වී ජාන තාක්ෂණයේ හාස්කමක් බව කියන ඔවුහු බෞද්ධයන්ගේ විශ්වාසය මිථ්යා අදහසක් හැටියට සලකති.
ජාන සංයෝග කිරීමෙන් හයිබ්රිඩ් වී වර්ග නිපදවීම පිලිපීනයේ ඊරි මගින් කෙරෙන එක් ක්රියාවකි. හරිත විප්ලවය (ග්රීන් රෙවලූෂන්) නමින් ප්රසිද්ධ වූයේ මෙයයි. ලෝකයේ කුසගින්න නැති කිරීම සහ මන්දපෝෂණය නැති ලෝකයක් බිහිකිරීම තම පරමාර්ථය බව ඊරි සිය දහස් වාරයක් ලොවට කියා තිබේ. ‘අපි හාල් වර්ග හැදුවේ බෙහෙතට ගන්න නොවේ. මිනිසුන්ට බඩපුරා බත් කන්න’ යැයි ලංකාවේ ‘ගෝල්ඩන් රයිස්’ නිපදවූ ජ්යෙෂ්ඨ අභිජනන විද්යාඥයකු ගැඹුරු හඬින් ප්රකාශ කළ බව ලංකාවේ සති අන්ත පුවත්පතක පළවූ දිග ලිපියක සඳහන්ව තිබිණි.
සිංහලයන් වී වර්ග සිය ගණනක් නිපදවූයේ සාගින්න නිවීමට යයි කීම ඔවුන්ට කරන නින්දාවකි. ඔව්හු අම්මලාට කිරි එරවීම සඳහා වී නිපදවූහ. ඖෂධ වශයෙන් වී නිපදවූහ. ගව ආහාර පිණිස සහ පොහොර නිපදවීමට අවශ්ය පිදුරු ගැනීම, ඔවුන් මා වී වර්ග නිපදවන්නට එක් හේතුවකි. දෙමුහුන් වී මේ හැම වී වර්ගයක්ම වඳ කරගෙන පැතිරුණි. එය ආණ්ඩුව සහ කෘෂිකර්ම ඇමැතිවරයා යොදාගෙන පිහිටුවූ පලදා සංවර්ධන කමිටු මගින් සිදුකරන ලද ජාතික අපරාධයකි. මෙම ක්රියාවෙන් පසු ලංකාවේ ගොවියාගේ බිත්තර වී නිපදවීමේ බලය නැතිවිය. වර්තමාන ලංකාවේ සියයට අනූනවයක් ගොවියෝ කන්නයක් පාසා අනුන්ගේ බීජ ගබඩාවලින් බිත්තර වී මිලයට ගනිති. තමන් බීජ නිපදවන සමාගම් ඉදිරියේ අසරණ වී සිටින බව ඔවුන් බොහෝ දෙනෙක් නොදනිති. එය ඇමරිකාවේ සිටි වහලුන්ගෙන් විශාල පිරිසක් තමන් වහලුන් යැයි දැන නොසිටි බව කියවෙන කතාවට සමාන පුවතකි.
සිංහල ජාතිය ආරම්භ වූ පිළිවෙළ වංශ කතාවේ සඳහන් වේ. සිංහල ජාතියේ භාෂාව සිංහල වූයේය. සියලුම ලාංකික දරුවන්ට ඉංග්රීසි අධ්යාපනය දිය යුතු යයි පවසමින් සිංහලයන්ගෙන් ඡන්දය ඉල්ලන අපේක්ෂකයෝ මැතිවරණයට ඉදිරිපත් වී සිටිති. මොවුන් තමන්ගේ යහපතට කටයුතු කරතැයි සිතන සිංහලයෝ සිටිති. සිංහල දේශයේ නිපදවූ සහල් ජාත්යන්තර වෙළෙඳ පොළට ඉදිරිපත් කළ වෙළෙඳුන් ගැන තොරතුරු තිබේ. සිංහල හාල් යන නම ඔවුන් ප්රබන්ධ කරන ලද්දකි. සුවඳැල් පර්සියානු වෙළෙඳ පොළේ ජනප්රිය ව පැවති සිංහල හාලකි. පර්සියානු කවියන්, සුවඳ හමන සිංහල හාල් ගැන සඳහන් කර තිබේ. දුක් මහන්සි වී වියදම් කර ‘ගෝල්ඩන් රයිස්’ නිපදවීමෙන්, ලංකාවට ලෝකයේ කීර්තියක් නොලැබේ.
හයිබ්රිඩ් වී වර්ග ප්රචාරය කරන්නන්ගේ එක් මූලික තර්කයක් වන්නේ දීර්ඝ කාලයක් වගා කිරීම නිසා පැරණි සිංහල වී වර්ගවලින් වැඩි අස්වැන්නක් ලබාගත නොහැකි බවයි. ලෝකයේ කුසගින්න අධික වේගයෙන් පැතිරෙන බව ඔවුන්ගේ තවත් පැහැදිලි කිරීමකි. මේ හැම තර්කයකින්ම සිදුකරන්නේ ජාතික උරුමය පාගා බටහිර මතය රජ කරවීමයි. මෙය ලංකාවේ පිහිටුවූ බ්රිතාන්ය අධ්යාපන ක්රමයේ විපාකයකි. මෙතෙක් අණ්ඩා දමා පිළිසකර කිරීම විනා ලංකාවේ ජාතික අධ්යාපන ප්රතිපත්තියේ වෙනසක් සිදුවී නැත. එයින් කෙරෙන්නේම කළු සුද්දන් බිහිකිරීමයි.
අනාගාරික ධර්මපාලතුමාගේ එක් අරමුණක් වූයේ සිංහලයන් අතර පැතිරෙමින් පැවති පරගැති චින්තනය නැතිකර දැමීමයි. ඊට සුද්දන්ගෙන් මෙන්ම කළු සුද්දන්ගෙන් ද විරෝධය එල්ල විය. ලංකාව ප්රයෝජනය නොගෙන ඉන්දියාවට තල්ලු කළ ධර්මපාලතුමාගෙන් ලෝකයම ප්රයෝජන ගත් බවට සාක්ෂි තිබේ. මේ ඊට නිදසුනකි.
ධර්මපාලතුමා කොළඹ පරම විඥානාර්ථ සමාගම කුපිත කරමින්, ඇමරිකාවේ චිකාගෝහි පැවැති ආගමික පාර්ලිමේන්තුවේ ලංකා නියෝජිතයා බවට පත් වූයේය. එහිදී එතුමා පැවැත්වූ දේශනය සහ ඊට ඉදිරිපත් කළ පත්රිකාව ඇමරිකානුවන් පිරිසකගේ අවධානයට යොමුවිය. මහාචාර්ය විලියම් ජේම්ස් එතුමාට හාවඩ් විශ්වවිද්යාලයේ දේශනයකට ආරාධනා කිරීම එහි ප්රතිඵලයකි.
මහාචාර්ය විලියම් ජේම්ස් ඇමරිකානු මනෝ විද්යාවේ පියා (Father of American Psychology) වශයෙන් සැලකේ. ඔහු පිළිබඳ ලිපි රාශියක් අන්තර්ජාලයේ අඩංගු වේ. මෙතුමාගේ අරාධනා පරිදි ධර්මපාලතුමා හාවඩ් විශ්වවිද්යාලයට ගිය ගමන ගැන සඳහන් ලේඛන සඳහන් කරන ලෙසට, මහාචාර්යවරයා සිසු සිසුවියන් පිරිසකට දේශනයක් පවත්වමින් සිටියේය. ධර්මපාලතුමාව පිළිගත් මහාචාර්යවරයා, එතුමාව වේදිකාවට කැඳවාගෙන විත් තමාගේ ආසනය පිළිගන්වා බුදුදහම සහ මනෝ විද්යාව ගැන ඉගැන්වීමට තමාට වඩා සුදුස්සා ධර්මපාලතුමා බව ප්රකාශ කළේය. දේශනයෙන් පසු සභාව ඇමතු මහාචාර්ය විලියම් ජේම්ස් ඉදිරි විසිපස් අවුරුද්ද තුළ ඇමරිකාවේ මනෝවිද්යාව ගොඩනැගෙන්නේ ධර්මපාලතුමා පැහැදිලි කළ දැක්ම මත යැයි සිසු සිසුවියන්ට පැවසුවේය.
බටහිර අනුකාරකයන් කරන්නේ මීට වෙනස් ක්රියාවකි. ලංකාවේ ගෝල්ඩන් රයිස් නිපදවීම පිළිබඳව සඳහන් ඉහත කී පුවත් පත් ලිපියේ පාඨකයන්ගෙන් යට දැක්වෙන ප්රශ්න අසා තිබුණි.
‘‘දුටු ගැමුණු රාජ සමයේ තිබුණා යයි කියන දසමහා යෝධයන් කෑ බව කියන සහල් වර්ග අද තිබෙනා සාම්ප්රදායික සහල් වර්ගමය කියල සහතිකය දෙන්නට හැකියාවක් ඇත්තේ කාටද? ගොයම් ගසක් සියවස් ගණනක් තුළ පරිණාමයට හසුවෙන විට වෙනස්වීම්වලට හසු නොවන්නේද? අනෙක් අතට කණ්ඩුල ඇතුගේ දළවලින් අල්ලා පස්ස බිම ඇනපු නන්දමිත්ර හා පළමු සතුරාගේ ගසා දැමුණු හිස බිම වැටෙන්නටත් පෙරාතුව දස වෙනි සතුරාගේ හිස සිඳින තරමට වේගයක් හිමි සුරනිමල කෑ සහල් වර්ග නොවෙනස්ව අද දක්වා පවතින්නේ යයි පැවසීම මේ අනුව සාධාරණද?”
පැරණි සිංහල වී වර්ග ස්වල්පයක් තවමත් ලංකාවේ පවතී. ඒ වී වර්ග ජනප්රිය කරවීමට සහ පැරණි සිංහල වී ගොවිතැන යළි ගොඩනැංවීමට වෙහෙසෙන ස්වල්ප පිරිසක් හෝ ලංකාවේ සිටිති. හයිබ්රිඩ් වී ජනප්රිය කිරීම සඳහා කෙරෙන මෙබඳු ප්රශ්න කිරීම් නිසා සිදුවන්නේ ඒ වැඩපිළිවෙළට පහර වැදීමයි.
ගෝඨාභය රාජපක්ෂ ජනාධිපතිවරයාගේ නායකත්වයෙන් බිහිවන අලුත් රජයක මූලික ප්රතිපත්තියක් විය යුත්තේ වී ගොවිතැන දියුණු කිරීමයි. පොහොර සහ බිත්තර වී නිපදවාගත හැකි ගොවි පරපුරක් බිහිකිරීම ඊට අයත් වැදගත්ම කටයුත්තකි. ගොවීන්ට බිත්තර වී නිෂ්පාදකයන් විය හැක්කේ ‘ ‘හයිබ්රිඩ් වී’ ගොවිතැනෙන් නොවේ. සම්ප්රදායික වී ජනප්රිය කිරීමෙනි. ලංකාවේ කෘෂිකර්ම විද්යාව නමින් කෙරෙනුයේ හයිබ්රිඩ් ගොවිතැනට රට බිලි දීමයි. ගොවියන් රසායනික නාශක සහ පොහොර වහලුන් බවට පත්කරනු ලැබ ඇත්තේ හයිබ්රිඩ් ගොවිතැන මගිනි.
කොලට් සේනානායක
නාරද කරුණාතිලක
Copy : සැගවුණ සුවද
