26/08/2025
නාන කාමරේ!
බොහෝ දෙනෙක් මගෙන් අහන, හුගක් තැන් වල දකින ප්රශ්නයකට පොඩි විසඳුම් ටිකක් ... .....
ගෙදරක් කියන්නෙ හිත නිවන තැනක්.. කෙනෙක් විවේක ගන්න තැනක්.. ගෙදරක තියන පුංචිම, අමතක වෙන සුලු, නිවස ඉදිකරනකොට කුඩම්මගෙ සැලකිලි ලැබෙන, ඒත් නිවසේ වැදගත්ම තැන ගැනයි මේ කතිකාවත..
නාන කාමරය. බොහෝ ගෙවල් වල නාන කාමරය නිතරම තෙතබරි උන, අඳුරු තැනක්. නමුත් නාන කාමරය නිවසේ තියන ලස්සනම තැනක් කරන හැටි කතා කරමු.
1. නාන කාමරය භාවිත කරන විදිහ ගැන සිතමින් එය සැලසුම් කිරීම ඉතා වැදගත්. නාන කාමරයේ වැඩි පුරම භාවිතා වෙනේ මුහුණ සෝදන බේසම හෙවත් සින්ක් එක. ඉන් පසු වැසිකිලි බඳුන හෙවත් කොමඩ් එක. ඊලඟට වතුර මල. එසේ නම් ඇතුල් වුන පසු ඉක්මනින් ම ලඟා විය හැකි තැන සින්ක් එකත් , ඊලඟට වැසිකිලි පෝච්චියත් , ඊලඟට වතුර මලත් වශයෙන් සැලසුම් කරගැනීම ඉතාම වටිනවා.
2. වියලි නාන කාමර හෙවත් dry bathroom කියන සංකල්පය සිතා බලමු. නාන කාමරයේ තෙත රැඳෙන කොටස්, එසේත් නැත්තම් වතුර මල සහිත කොටස නාන කාමරයේ අනෙක් කොටස් වලින් වීදුරු තහඩුවකින් හෝ බිත්තියකින් වෙන්කර ගත් විට අනෙක් කොටස නඩත්තුව හරිම පහසුයි. අතු ගෑම පමණක් ප්රමාණවත්. නාන කාමරයට යන හැම විටම කකුල් තෙමා ගැනීමට අවශ්යතාවයක් නැහැ.
3. තුන්වන කාරණය , නාන කාමරයට හොඳින් ආලෝකය සහ වාතාශ්රය ලැබිය යුතුමයි. මදක් මිල අධික උනත් හොඳින් වාතාශ්රය ලැබෙන , වීදුරු සහ ලූවර් සහිත හෝ වෙනත් ආකාරයක ආලෝක හා වාතාශ්රය ලැබෙන ක්රමයක් සවි කල යුතුමයි.
4. පොලව සහ බිත්ති සකස් කිරීමේදී, අනවශ්ය වියදම් කරන මුත් අවශ්ය දේවල් නොකරන අවස්ථා බොහෝයි. නාන කාමරයක් නිර්මාණය කිරීමේ දී හොඳින් බිත්ති සහ පොලව ජල ආරක්ෂණය කල යුතුමයි. ඉන් පසු පොලව නිසි ආකාරයෙන් ආනතිය පවත්වාගෙන ටයිල් කරගත හැකි. ලිස්සන සුලු ටයිල් නොවන, සරල පාටක ටයිල් එකක් බිමට අල්ලා ගත හැකි. නාන කාමරයේ වියලි කොටසේ බිත්ති වලට ටයිල් ඇල්ලීම අත්යාවශ්ය නැහැ. සුද මැදපු සිමෙන්ති, සාමාන්ය ආකාරයට බිත්ති පාට කිරීම වැනි අඩු මිල විසඳුමක් මෙයට ගැලපෙනවා. නාන කොටසේ බිත්තිය පමණක් අඩි 6 පමණ උසට ටයිල් හෝ ටයිටේනියම් වැනි දෙයකින් ආවරණය කර ගැනීම ප්රමාණවත්.මෙහිදී විවිධාකාර රටා නැති, සරල ටයිල් එකක් තෝරාගැනීම වැදගත්.
නාන කාමරය යනු නිවෙසක වැදගත්ම සහ බොහොම ප්රවේශමෙන් කල යුතුයි. මෙවැනි දේ නිසායි කුඩා නිවසක් උනත් නිර්මාණයට සුදුසුකම් ලත් වරලත් ගෘහ නිර්මාණශිල්පියෙකුගේ සහය ලබා ගත යුතු. ඔබේ නිවස ඔබේ ඉතිරි ජීවිත කාලය ගෙවන්නට කරන ලොකු ආයෝජනයක්. ඒ වෙනුවෙන් වෘත්තීය සහය ලබා ගැනීම අනිවාර්යයි.
