24/06/2021
උද්යාන නිර්මාණ මූලධර්ම.(Part 01)
Principles Of Landscape Gardening.
උද්යාන නිර්මාණය කිරීමේදී අනුගමනය කළයුතු පිළිගත් මූලධර්ම කීපයක් ඇත.
(අ) ඒකාත්මතාව - Unity
උද්යානයක සිටුවන පැල වර්ග ඒකාත්මතාවයකින් යුතු විය යුතුය.මුළු උද්යානයම ඒකකයක් ලෙස ගත් කල මෙම ඒකාත්මතාව දිස්විය යුතුය.උද්යානයක හිරු එළිය තිබෙන ස්ථානයක රතුපාට salvia හෝ ixora සමග නිල්පාට salva හෝ නිල්පාට anjilonia පල සිටු වන්නේ නම් එම සම්මිශ්රණය මල් ගොමුවෙහි තවත් ස්ථානයක වර්ණ ගලපා නැවත සිටුවිමට පිළිවන.එසේම උද්යානයක ඉදි කරන මාවත් පියගැට පෙලවල්,මල් ආරුක්කු හා දොරටු ආදිය ද පැල හා ඒකාබද්ධ වන ලෙස නිම කළයුතු වේ.
(ආ) සමබරතාව - Balance
උද්යානයක හඳුන්වා දෙන පැල වර්ග හා විශේෂිත අංග වල සමබරතාවක් තිබිය යුතුය.සමබරතාවයකින් යුතුයව පැල සිටුවා තිබෙන උද්යානයක ඒකාග්රතාවයක් මෙන්ම පැල කෙරෙහි කේන්ඳ්රගත අවදානයක් යොමු වන් ඇත.උද්යානයකට ඇතුල්වන ප්රධාන පාරෙහි එක පැත්තක විශාල ගසක් සිටුවන අතර විරුද්ධ පැත්තෙහි කුඩා ගස් දෙකක් සිටුවා සමබරතාව රැකගත හැකිය.
(ඇ) පරිමාණය සහ ප්රමාණුකූලතාව - Scale And Proporation
උද්යානයක සිටුවීමට පැල තේරීමේදී නිවාස වලට හා ගෘහ නිර්මාණ කලාවට අදාල ප්රමිතියට අනුකූලතාවක් දැක්විය යුතුය.උසට හැදෙන Horsfieldia iryaghedi ගසක් හෝ Tabuebuia rosea/serratifolia ගසක් කුඩා නිවසක් ඉදිරිපිටට නොගැලපේ.එසේම තට්ටු නිවාසයක් ඉදිරිපිටට කුඩා ගසක්ද නොගැලපේ.
(ඈ) විවිධත්වය - Variety
උද්යානයක විවිධ පැළෑටි වර්ග සිටුවීම සමබරතාවට හානි නොවන ලෙස ඉටුකළ විට එය කුතුහලයට ද හේතුවක් වනු ඇත.තණ පිට්ටනිය අයිනෙහි දම් පාට Boganvillia පඳුරු කිහිපයක් පැලකිරීම දෑස පිනවන දසුනකි.කොළපාට පත්ර සහිත පැළ ගොමුවක රෝස පාට Cannas පාත්තියක් ඇති කිරීම ඉතා අලංකාර වේ.විවිධ වර්ණ සහිත පැළ වර්ග සිටුවීමෙන් ඒකාකාරී බවෙන් මිදීමට පිලිවන.එහෙත් අසීමිත ලෙස විවිධ වර්ග හඳුන්වා දීම යෝග්ය නොවේ.
(උ) උද්යාන නිර්මාණ කිරීමට බලපාන සාධක - Aspect Which Influence Garden Lay - Out
01.පසෙහි පිහිටීම.
පසෙහි සංයුතිය පරික්ෂා කළ යුතුය.මැටි සහිත පසක් නම් වැලි යොදා පස සැහැල්ලු කළ යුතුය.තද වැලි සහිත පසක් නම් මතුපිට පස් යෙදීමට පිළිවන ගල් බොරළු සහිත නම් ඒවා ඉවත් කළ යුතුය.
02.ජලය බැසයාම.
තණ පිට්ටනිය සහ මල් පාත්ති සැකසීම ට පෙර වර්ෂා ජලය බැස යාම පිළිබඳව විමර්ශනය කළ යුතුය.ගෘහයෙන් පිටතට ජලය බැස යන අයුරු බෑවුමක් තිබිය යුතුය.මේ අනුව මීටරයකට සෙන්ටිමීටර් එකක් බෑවුම තිබෙන ලෙස මිදුල සැකසිය යුතු වේ.
03.හිරු එළිය ලැබීම.
උද්යානයට හිරු එළිය වැටීම පැළෑටි වැඩීමට ඉතා අවශ්ය වේ.ගෘහය දෙසට බැසයන හිරු රශ්මිය වැටේ නම් සෙවන ගස් සහ ආවරණ යෙදීමෙන් එය වළක්වා වළක්වා ගත හැකි වේ.
04.ගෘහයෙහි ඉදිරිපස සහ පිටුපස පිහිටීම.
ගෘහයෙහි ඉදිරිපස හා පිටුපස පිහිටා ඇති ගස් හා ගොඩනැඟිලි මොනවාදැයි සටහන් කර ගතයුතු වේ.නිරතුරුවම රථවාහන ශබ්දය ඇසෙන මහාමාර්ග තිබේනම් ශබ්දය හා දූවිලි පාලනය කිරීම සඳහා ගස් හා පඳුරු සිටවිය යුතුය.අශෝභන දර්ශන ඇත්නම් ඒවාද ආවරණය කිරීමට ගස්වැල් සිටුවීමට පිළිවන.
05.සුළං හමන දිසාව.
සමහර උස් ප්රදේශ වල ඉදිකරන ලද නිවෙස් වලට යම් කාලවලදී තද සුළං ඇති වේ.මින් ආවරණය වීම සඳහා ශක්තිමත්ව උසට වැඩෙන ගස් නිවසට ඈතින් සිදුවීමට පිළිවන.ඒ සඳහා සුළං බාධක ලෙස මහෝගනී,අරළු,ඔුළු,කුඹුක් හා සියඹලා ආදී උසට වැඩෙන ගස් වර්ග සිටු වීමට පිළිවන මෙය කළ හැක්කේ ගෙවත්ත තුළ ඉඩ ඇතොත් පමණි.
(02)අලංකාර සාධක - Aesthetic Aspect
කඳුකර ප්රදේශයක තනා ඇති නිවසක් වටා ඉතා අලංකාර උද්යානයක් නිර්මාණය කළ හැකිය.කඳු බෑවුම සම්පූර්ණයෙන්ම සමතලා නොකර තට්ටු ක්රමයට මට්ටම් කර ඒ මත පිට්ටනි සහ මල් ගොමු සැකසීමට පිළිවන.උස් භූමියක් මත අවට සිත් සිත්කලු දර්ශන පෙනීමද වටිනා අංගයකි.මේ නිසා මහනුවර හා නුවරඑළිය වැනි ප්රදේශවල කඳු ආශ්රිතව නිවාස සැදීමට බොහෝ දෙනා පෙළඹී ඇත.එහෙත් මෑතකදී ඇති වී තිබෙන භූ චලන හා නායයෑම් හේතුවෙන් කඳුකරයේ නිවාස සෑදීමේදී භූගර්භ විද්යාඥයින් ගේ අදාළ උපදෙස් ලබා ගැනීම වැදගත් වේ.
භූමියේ පිහිටී ඇල දොල,දිය ඇලි,වැව් පොකුණු ආදියද උද්යාන නිර්මාණයට බලපාන අලංකාර සාධකයන්ය.මේ ආශ්රයෙන් ජලධාරා,වැව්,පොකුණු හා ගිරි උයන් නිර්මාණය කර ගැනීමට පිළිවන.
තවත් කෙනෙක්ට දැන ගැනිමට share කරන්න.
