15/10/2026
🏠"СЭРҮҮН" КОМПАНИЙН ТҮҮХИЙГ БҮТЭЭЛЦЭГЧИД #10
#Сэрүүн35Жил
"Инженерээс эхлээд ХАБ, Нярав, Хангамж гээд байгууллагынхаа чухал салбар бүрт хувь нэмрээ оруулж, 7 жилийн турш бидэнтэй хамтдаа хөгжиж буй манай гэр бүлийн нэгэн гишүүн А.Мандахбадрал инженертэй хийсэн ярилцалгыг хүлээн авна уу.
1. Анх ажилд орж байсан үе болон одоогийн өөрийгөө харьцуулбал танд ямар өөрчлөлт, өсөлт харагдаж байна вэ?
2019 онд “Сэрүүн” ХХК-д Автоматикийн инженерээр ажилд орохдоо зөвхөн өөрийн мэргэжлийн хүрээний ажилдаа анхаардаг байсан. Мэргэжлээрээ ажиллахаас гадна нярав, хангамжийн менежерээр 4 жил ажилласнаар байгууллагын үйл ажиллагааг олон талаас нь ойлгодог болсон. Одоо би аливаа ажлыг зөвхөн техникийн талаас нь биш, аюулгүй байдал, материал хангамж, зардал, зохион байгуулалт гээд бүх талын уялдаа холбоонд нь өргөн хүрээгээр хардаг болсон маань миний хамгийн том өсөлт юм.
2. Инженер, ХАБ, нярав, хангамж гээд олон төрлийн ажил хийж үзэх нь таныг хэрхэн хөгжүүлсэн бэ?
Олон салбарт хөрвөн ажилласан нь надад асар том сургууль болсон. Инженерийн ажлаар техникийн мэдлэг, асуудал шийдвэрлэх арга барилд суралцсан бол ХАБЭА-н ажлаар хүний амь нас, аюулгүй ажиллагааны чухлыг ойлгосон. Харин нярав, хангамжийн менежерээр ажиллахдаа материалын бүртгэл, нөөц, зардал, цаг хугацааны төлөвлөлтийг бодитоор сурсан. Хөрвөх чадвартай байна гэдэг нь бүхнийг мэддэгт биш, шинэ зүйлд суралцаж, хариуцлага хүлээхэд бэлэн байхыг хэлнэ.
3. Ажилласан салбар бүрээсээ авсан хамгийн том сургамж, давуу тал юу вэ? Нярав хийсэн нь инженер хийхэд ямар давуу талтай байдаг вэ?
Салбар бүр өөрийн гэсэн үнэ цэнийг өгсөн. Инженерээр техникийн стандарт, хяналтын инженерээр чанарын шалгалт, ХАБЭА-гаар эрсдэлээс сэргийлэхийг сурсан. Харин нярав, хангамжаар ажилласан туршлага маань одоо инженерийн ажлаа төлөвлөхөд материалын нөөц, нийлүүлэлтийн хугацаа, зардлын нөлөөг бодитой тооцоолж, цаг хугацаагаа зөв зохицуулахад асар том давуу тал болдог. Байгууллагын аль ч хэсэг тусдаа биш, бүгд хоорондоо холбоотой байдгийг ойлгосон нь хамгийн том сургамж юм.
4. Одоо инженер болон ХАБЭА-н ажлыг хавсран хийж байгаа. Чанар, аюулгүй байдал, хурд зөрчилдөх үед хэрхэн тэнцвэржүүлдэг вэ?
Эдгээр нь хоорондоо өрсөлдөх зүйл биш, зөв зохион байгуулалттай байх ёстой гурван чухал үзүүлэлт. Ажлыг хурдан дуусгах гэж аюулгүй байдлыг орхигдуулвал урт хугацаандаа илүү том эрсдэл, алдагдал дагуулдаг. Тиймээс эхлээд эрсдэлээ үнэлж, аюулгүй байдлыг хангасны дараа ажлаа чанартай төлөвлөдөг. Миний зарчим бол ажлыг аль болох үр ашигтай хийхийн зэрэгцээ хүний эрүүл мэнд, аюулгүй байдлыг хэзээ ч хоёрдугаарт тавихгүй байх явдал юм.
5. “Сэрүүн” ХХК-д олон жил ажиллахын хамгийн гоё зүйл юу вэ? Таныг юу ингэж татдаг вэ?
Сурсан зүйлээ бодит ажил дээр хэрэгжүүлж, өөрийгөө шинэ чиглэлээр сорих боломжийг байгууллага маань олгож ирсэн. Нэг байгууллагад дуртай замаараа хөгжиж, ажлын орчин, хамт олноо сайн мэддэг болсноор илүү үр дүнтэй ажиллах давуу тал үүсдэг. Би нэг байрандаа зогсох биш, байгууллагатайгаа хамт суралцаж, хөгжиж ирсэн нь хамгийн сайхан зүйл юм.
6. Шинээр ажилд орж байгаа болон нэг байгууллагад тууштай, олон талын чадвартай ажиллахыг хүсэж байгаа залууст өгөх гол зөвлөгөө тань юу вэ?
Анхнаасаа бүхнийг мэддэг байх албагүй, харин сурах хүсэлтэй, хариуцлагатай, чин сэтгэлтэй байх нь чухал. Шинэ ажил, үүрэг хариуцлагаас бүү ай, бусад хүмүүсийн хийж буй ажлын уялдааг ойлгохыг хичээгээрэй. Тууштай байна гэдэг олон жил нэг л зүйлээ хийх биш, хамтдаа хөгжиж, өөрийн үнэ цэнээ нэмэгдүүлэхийг хэлнэ. Ямар ч ажлыг жижиг гэж гололгүй суралцаж, өөрийгөө байнга хөгжүүлээрэй. Энэ нь маргаашийн шинэ боломжийн үүдийг нээж өгнө.
Олон салбарт хөрвөн ажиллаж, өнөөдөр Инженер болон ХАБ-ын хариуцлагатай албыг хослуулан авч яваа тандаа цаашдын ажилд нь өндөр амжилт хүсье! 🛠️👷♂️
