04/04/2026
TAN-AWA| 28-ANYOS NGA LALAKI, SIKOP SA ILEGAL NGA PAGBALIGYA OG MGA ENDANGERED BIRD SPECIES
Sikop sa mga operatiba sa Regional Anti-Cybercrime Unit 13 atol sa ilang entrapment operation ang 28-anyos nga lalaki gumikan sa ilegal nga pagbaligya sa endangered nga mga langgam didto sa Nasipit Bus Terminal sa Nasipit, Agusan del Norte niadtong Abril 1, 2026, ala 1:30 sa hapon.
Ang operasyon gipangulohan ni PCOL Lemuel B Gonda uban sa Nasipit Municipal Police Station ubos sa liderato ni PCPT Mergel Anthony B Plaza, sa pakigtambayayong sa mga personnel sa Department of Environment and Natural Resources ug usa ka barangay kagawad.
Naila ang suspek nga si alyas “Kokoy,” nga nasakpan sa ginadudahang ilegal nga pagbaligya og mga endangered bird species.
Paga-atubangon karon sa suspek ang kaso sa paglapas sa Republic Act No. 9147 o ang Wildlife Resources Conservation and Protection Act, inubanan sa Republic Act No. 10175, tungod sa paggamit sa online platform sa maong ilegal nga kalihokan.
