24/10/2024
| BUS UG TRAILER TRUCK NAG-BANGGA SA BUNAWAN, KAPIN 15 KA MGA PASAHERO NA-ANGOL
Davao City - Padayong gitambalan sa Southern Philippines Medical Center (SPMC) ang anaa sa kapin 15 ka mga pasaherong nasamdan diin ang uban niini nakaangkon og minor injuries human sa nahitabong bangga tali sa Metro Shuttle Bus ug Trailer Truck nga nahitabo kagahapon, alas 3:00 sa hapon, October 23, 2024 duol sa Daniel Perez Elementary School, Bunawan, Davao City.
Sa interview sa DXDC RMN Davao kang Police Executive Master Sargent Ruben Madera, Chief Investigator sa Traffic Enforcement Unit (TEU), gisulti niya, angol usab ang driver sa trailer truck nga si Randy Tampus, hingkod ang edad, taga Brgy. Bunawan, Davao City ug wala pa mailhing driver sa bus kinsa padayon usab gitambalan sa maong hospital.
Segun ni Madera, sa inisyal nga imbestigasyon, nasayran nga nag-biyahe ang duha ka sakyanan sa opposite nga direction, ang bus gikan sa Davao padulong sa dakbayan sa Tagum, samtang ang trailer truck padulong sa Davao, apan pag-abot sa maong lugar, giingong nikawat og lane ang bus hinungdan nga sila nagbangga.
Dugang ni Madera, adunay inisyal nga nasabutan tali sa duha kampo, diin abagahon sa bus company ang galastuhon sa pagpatambal sa mga naangol.
via RadyoMaN Don Pulayao
