24/02/2026
OPISYAL NGA PAMAHAYAG
Pebrero 21, 2026
Sa bag-uhay lang nga gipagawas nga Desisyon sa Korte Suprema kabahin sa gi-file nga Petition for Certiorari sa NORDECO, PADAYON gihapon nga makaserbisyo ang atong Electric Cooperative (EC) sa tibuok franchise area subay sa prangkisa nga gihatag niini hangtud tuig 2028 sa Mainland ug 2033 sa Island Garden City of Samal (IGACOS), SAMTANG GITUGUTAN ang Davao Light and Power Company (DLPC) nga mo-operate sa prangkisa sa NORDECO subay sa gilagda nga mga requisitos sa balaud.
Base sa Desisyon, wala gitanggalan og prangkisa ang NORDECO gani giila ang paglungtad niini samtang buhi pa ang prangkisa sa atong EC. Susama kini sa desisyon sa Korte Suprema nga co-existence o magdungan sa pag-operate ang Iloilo I, II, ug III Electric Cooperatives ug More Power sulod sa usa ka prangkisa.
Busa, magpabilin gihapon ang NORDECO sa posisyon niini nga MAGPADAYON sa paghatag og Serbisyong Kinasingkasing isip lig-ong kauban sa atong gobyerno sa pag-implementar sa rural electrification program. Pagabuhaton pud sa atong EC ang tanang posible nga mahimo subay sa balaud ug lagda sa korte sa pagtuman sa mandato niiini aron malikayan ang pagkabalda sa operasyon, samtang atong gipaningkamutan nga makakuha tag bag-ong prangkisa.
Atong saligan ug lauman nga MAGPABILING LIGDONG ug LIG-ON ang atong NORDECO luyo sa mga hagit uban natong mga miyembro-konsumante-tag-iya aron maprotektahan ang atong equity lakip na na ang mga donated capital sa local ug nasyonal nga panggamhanan.
Daghang salamat.
